Dicit ergo : " Et similitudines locustarum, " id est, haereticorum et praedicatorum Antichristi: qui sicut et locustae faciunt saltum per superbiam, et cadunt per avaritiam, debiliter stant per luxuriam. Et est argumentum hic, quod visio fuit imaginaria, supple, erant " similes equis paratis in praelium, " id est, ad praelium, quasi cum impetu currentes, et sine discretione in depressionem electorum. Unde Haymo : " Equis comparantur haeretici, propter eorum velocem ubique discursum. " Item Beda : " Sicut equi non propria ratione, sed impetu praesidentis aguntur in praelium : ita mali Doctores daemoniaco acti spiritu Ecclesiam impugnabunt. "

" Et super capita earum, " id est, super doctores haereticorum, " tamquam coronae, " id est, victoriae de oppressione justorum. Et dicit: " Tamquam, " quia non erunt verae coronae, sed tantum in eorum opinione. " Similes auro. " Haymo : " Quia ipsi se sicut victores simulabunt, et remuneratione dignos, ac si essent Sancti qui per aurum intelliguntur. " Vel sic : " Super capita earum, " id est, mentibus earum : mens enim caput est: " tamquam coronae, " id est, retributiones aeternae, " similes auro, " scilicet verae sapientiae. Quasi dicat : Coronas suas doctoribus suis attribuunt, et sibi praemia aeterna de eo quod per falsam sapientiam Ecclesiam inpugnarunt.

Vel, " Similes auro, " id est, Apostolis, auibus suos doctores aequiparabunt.

" Et facies earum tamquam facies hominum.

Et habebant capillos sicut capillos mulierum, et dentes earum sicut dentes leonum erant."

Hic notatur modus nocendi.

Et dicuntur tria. Primo dicit, quod praetendunt aliquid bonum. Secundo, signatur latens malum, ibi, v. 8 : " Et habebant capillos. " Tertio, tangitur apertum malum, ibi, " Et dentes earum. " Vel, primo tangitur boni apparentia, secundo latens malitia, tertio aperta saevitia.