186. De sancto Columbano.
Ad Vesp, et Noct,

1. Auctori mirabilium

Cantemus novum canticum
Sublata cujus gratia
Nostra frustantur merita.

2. Quibus ergo miraculis
Enituit in populis
Columbanus sanctissimus,
Dicamus in sequentibus.

3. Hunc paritura filium
Vidit mater per somnium
De sinu solem surgere
Et terris lucem fundere.

4. Hic factus alter Moyses
Traxit de petra latices,
In colligendis messibus
Suspendit imbrem nubibus,

5. Corvus Noe despiciens,
Eliae quamvis serviens,
Chirothecas, quas abstulit
Furtim, patenter attulit.

6. Pro bove, quem necaverat,
Ursus onus subierat,
Bovis implens officium
Jussu patris ut proprium.

7. De trunco lapsus cuneus
Os frontis fregit protinus,
Quod sanctus Dei famulus
Sputo sanavit citius.

8. Mundavit leprae maculam,
Daemonum fugans copulam
Febricitantem feminam
Sanat per Dei gratiam.

9. Patrata cujus gratia
Sunt tanta mirabilia,
Nos et hunc locum protege,
Rex in aeternum Domine.