Est ergo sensus: " Qui parati erant in horam, etc, " id est, in omni parte temporis affligere continue et sine interpolatione, sicut non invenitur interpolatio inter partes diei, mensis et anni. Et dicuntur parati, ut etiam nos parare studeamus, et imparati non inveniamur. Matth. XXIV, 44 : Ideo et vos estote parati.

" Ut occiderent. " Quasi dicat: Ad hoc erant parati, ut occiderent prius morte culpae, et postea morte gehennae.

" Tertiam partem hominum, " id est, omnes reprobos. Prima pars hominum sunt innocentes, secunda paenitentes, tertia reprobi. Vel, prima pars activi, secunda contemplativi, tertia reprobi.

Est ergo sensus : " Ut occiderent, " ut prius, " tertiam partem hominum, " hoc est, illos qui recedunt a binario innocentiae, et paenitentiae : vel activae vitae, et contemplativae, de qua, supra, VIII, 7: Et tertia pars terrae combusta est.

" Et numerus equestris exercitus vicies millies dena millia : et audivi numerum eorum.

Et ita vidi equos in visione. "

Hic est secunda pars quae est de visione equitum et equorum. i Et dicuntur hic quatuor. Primo, ponitur numerum equitum. Secundo, dicit se vidisse equos eorum, ibi, f. 17 : " Et ita vidi equos. " Tertio, describit equites eorum, ibidem, " Et qui sedebant. " Quarto, describit equos eorum, et capita equorum, ibidem, " Et capita equorum, etc. "