192. De sancto Dionysio.

1. Coeli cives, adplaudite
Mundi jucundo lumini,
Quo inlustratur coelitus
Hujus diei gratia.

2. Praecelsa fides martyris
Sacrique vita antistitis,
Dionysii nobilis,
Hodie palmam suscepit.

3. Areopago Athenae
Regis sumpsit diadema
Coelestis gemmam fulgidam
Dionysium sophistam.

4. Paulo docente speculum
Habet fides fidelium
Et spiculum gentilitas,
Quem ante murum uoverat.

5. Miro clarescens dogmate
Inluminavit Graeciam
Et inclitus hinc pontifex
Urbem Romanam adiit.

6. Clemente, Romae praesule,
Jubente venit Galliam,
Cui jubar solis splendidi
Inluxit signis, famine.

7. Tandem repulso daemone
Constructo sacro opere
Poenis adfectus maximis
Caesa cervice coelum petit.

8. Ave, pater, scandens polum,
Ave, pie visens solum,
Annua festi munera
Tua sacra praesentia.

9. Offer, sacerdos optime,
Gemitus nostros et preces,
Firma fidem, martyr Dei,
Moresque nostros corrige.
10. Ope guberna fragiles
In mundi hujus pelago
Atque exutos corpore
Pie, benignus, suscipe.

11. Quo sine fine gloriam
Deo patri et filio
Una cum sancto spiritu
Tecum canamus perpetim.