Unde dicit : " Et numerus equestris exercitus, " scilicet, daemonum et suorum equorum, " vicies millies, " id est, signatus per hos numeros non praecise numeratus. Unde ponitur finitum pro infinito. Et sic e contrario numerus equestris exercitus Dei tam hominum quam Angelorum, " dena millia, " id est, signatus per hos numeros.

" Et audivi numerum eorum, "

Id est, intellexi quid ille numerus signaret, vel quod plures essent mali quam boni.

" Et ita vidi equos in visione, "

Scilicet, sicuti vidi numerum equitum, ita intellexi numerum equorum. Et per equos intelliguntur praedicatores errorum super quos ascendunt daemones, sicut, Exod. xv, 1, dicitur : Equum et ascensorem dejecit in mare.

Vel sic : " Et ita vidi equos in visione, " id est, sicut equites intendunt ad destruendam Ecclesiam : sic vidi equos, id est, malos praedicatores tendere ad destructionem Ecclesiae. Nam equi et equites ad idem tendunt, sed dicuntur equi per equites a quibus ducuntur. Sic Antichristiani per daemones ducti contra Ecclesiam pugnabunt.

" Et qui sedebant super eos habebant loricas igneas, et hyacinthinas, et sulphureas. "

Hic describit daemones qui sunt equites a paena quam sustinent, et ad quam trahunt suos sequaces.

Et primo dicitur, quod poena eorum est indissolubilis : quod signatur, cum dicitur: " Loricas. " Secundo, quod est ardens: " Igneas. " Tertio, quod excaecans : " Hyacinthinas. " Quarto, quod fetens : " Sulphureas. "