Unde dicit : " Et audivi, " id est, intellexi " vocem de coelo, " id est, inspirationem a Deo missam, vel admonitionem Angelicam, " dicentem mihi : Signa, " id est, sub sigillo claude, " quae locuta sunt septem tonitrua, " id est, universi Praedicatores, " et noli ea scribere, " id est, infidelibus manifestare. Signa ergo ut inimicis lateant, et ut amicis pateant.

" Et Angelus quem vidi stantem super mare et super terram, levavit manum suam ad coelum.

Et juravit per viventem in saecula saeculorum, qui creavit coelum et ea quae in eo sunt, et terram et ea quae in ea sunt, et mare et ea quae in eo sunt: Quia tempus non erit amplius :

Sed in diebus vocis septimi Angeli, cum coeperit tuba canere, consummabitur mysterium Dei : sicut evangelizavit per servos suos Prophetas.

Haec est tertia pars, in qua introducitur Angelus asserens et annuntians mundi finem.

Et dicunt hic duo. Primo, asserit mundo, quod cito erit. Secundo, quando erit, ibi, v. 7 : " Sed in diebus vocis septimi Angeli.