Continua sic : Praeliabantur Angeli, et auxilio eorum, supple, " projectus est draco ille, " scilicet, diabolus, qui draco dicitur propter immanitatem sceleris, sicut dicit Haymo, sive propter invidiam: " magnus, " propter superbiam, vel propter potentiam : " serpens, " propter astutiam. Genes. iii, 1 : Serpens erat callidior, etc.

" Antiquus, " propter peccandi consuetudinem, vel propter temporis antiquitatem : quia ab initio mundi nocens. Joan. viii, 44 : Ille homicida erat, etc.

" Qui vocatur diabolus, " id est, deorsum fluens : quia alios facit fluere in peccata : vel quia ipse de peccato in peccatum fluere non cessat. Psal. lxxiii, 23 : Superbia eorum qui te oderunt ascendit semper.

" Et Satanas, " id est, adversarius. I Petri, v, 8 : Adversarius vester diabolus. Vel, " Satanas, " id est, contrarius, quia semper persequitur bonos.

a Qui seducit, " id est, seorsum a via veritatis ducit secundum fictionem suam, " universum orbem, " scilicet partem universi orbis, scilicet malos qui pereunt.

v Et projectus est in terram, " id est, in corda terrenorum : non quia ibi prius non esset, sed ut ibi magis dominaretur exclusus a bonis. Genes. III, 18 : Terram comedes omnibus diebus vitae tuae. Vel sic : " Projectus est in terram, " id est, de cordibus electorum in corda reproborum. Vel, " in terram, " id est, in infernum. Job, X, 22 : " Terram miseriae et tenebrarum. "

" Et angeli ejus cum illo missi sunt, " scilicet, sicut membra cum capite. II Petri, II, 4 : Si Deus Angelis peccantibus non pepercit, sed rudentibus inferni, etc. " Vel sic : " Projectus est draco, " per avaritiam : quia animal sitibundum est, et avarus semper sitit : " magnus, " per superbiam : " serpens, " per invidiam : " antiquus, " per gulam : quia hoc est antiquum peccatum primi hominis : " diabolus, " per luxuriam : quia interpretatur defluens : " Satanas, " per iram : " qui seducit universum orbem, " scilicet, per acediam. Et nota, quod hunc toties describit, ut melius sciamus cavere insidias ejus.

" Et audivi vocem magnam in caelo, dicentem : Nunc facta est salus, et virtus, et regnum Dei nostri, et potestas Christi ejus, quia projectus est accusator fratrum nostrorum, qui accusabat illos ante conspectum Dei nostri die ac nocte:

Et ipsi vicerunt eum propter sanguinem Agni, et propter verbum testimonii sui: et non dilexerunt animas suas usque ad mortem.

Propterea laetamini, caeli, et qui habitatis in eis. "

Hic subditur gratiarum actio pro victoria habita de diabolo.

Et dicuntur tria. Primo, redditur gratiarum actio a Sanctis. Secundo, ponitur invitatio Angelorum ad congratulandum cum eis,ibi, v. 12 : " Propterea laetamini, caeli. " Tertio, agitur de paena malorum

Angelorum exclusorum a bonis, ibidem, " Vae terrae et mari "

In prima parte dicuntur duo. Primo, redditur gratiarum actio Deo a Sanctis exhibita. Secundo, ponitur causa quare ei referatur gratiarum actio, ibi, " Quia projectus est. "