Dicit ergo : " Et audivi vocem magnam in caelo, " id est, in Ecclesia triumphante, " dicentem, " id est, signantem : " Nunc, " id est, principe mortis devicto. Vel, " Nunc, " id est, omni tempore vitae praesentis ab adventu Salvatoris usque ad finem mundi.

" Facta est salus, " quia per Christum sumus salvati. Psal. iii, 9 : Domini est salus.

" Et virtus, " quia per ipsum sumus roborati. Isa. xl, 29 : Qui dat lasso virtutem, etc.

" Et regnum Dei nostri, " id est, Patris nostri, qui nos regit, et proficere facit de virtute in virtutem, ut dicit Glossa.

" Et potestas Christi ejus, " id est, Filii, " quia projectus, etc. "

Vel sic : " Audivi vocem magnam in caelo, dicentem, " ut prius : " Nunc facta est salus, " scilicet, Ecclesiae per gratiam operantem, " et virtus, " per gratiam cooperantem, " et regnum Dei nostri, " per gratiam consummantem.Vel, " Salus, " id est, peccatorum remissio, " et virtus, " id est, bene operandi robur, " et regnum Dei nostri, " per vitiorum calcationem. Et bene dicit: " Facta est, " quia ante adventum Christi salus erat in fieri: post ejus adventum est in facto esse.

" Et potestas Christi ejus, " id est, Filii Dei Patris qui ad se omnia trahit. Joan. XII, 32 : Et ego, si exaltatus fuero a terra, omina traham ad meipsum. Et quia mali non trahuntur, ideo non sunt.

" Quia projectus est, " id est, procul iactus sine spe revertendi, " accusator fratrum nostrorum, " id est, diabolus cujus officium est accusare : " qui accusabat, " id est, accusabiles facere satagebat, suggerendo et inducendo in pecca- tum, " ante conspectum Dei nostri, " quem nihil latet. Ad Hebr. IV, 13 : Omnia nuda et aperta sunt, elo.