" Die ac nocte, " id est, continue. Vel secundum Haymonem, per prospera et adversa. Haymo : " Die ac note accusat, quando alios prosperitatibus extolli facit, alios adversitatibus frangi. "

" Et ipsi vicerunt eum propter sanguinem Agni, etc. "

" Et ipsi vicerunt eum, " scilicet fratres, auxilio Angelorum fulti. " Vicerunt, " inquam, resistendo tentationibus suis. Vel, " Vicerunt, " potestate liberi arbitrii. Hieronymus : " Debilis est hostis qui non vincit nisi volentes . "

Sed ne crederetur quod vicissent virtute propria tantum, subdit : " Propter sanguinem Agni, " id est, merito Passionis Jesu Christi, vel per fidem et virtutem Passionis : " et propter verbum testimonii sui, " id est, propter confessionem fidei apertam. Vel, " Propter verbum testimonii sui, " id est, propter praedicationem qua testati sunt Christi resurrectionem. Act. IV, 33 : Virtute magna reddebant Apostoli testimonium resurrectionis, etc.

" Et non dilexerunt animas suas usque ad mortem. " Glossa : " Non sic foverunt carnem suam ut animae perirent. " Quasi diceret : Magis elegerunt mori, quam ut animas suas carnaliter diligerent. Act. XX, 24 : Non facio animam meam pretiosiorem quam me.

" Propterea laetamini, caeli, etc. "

" Propterea, " scilicet, quia projectus est draco, et facta est salus, " laetamini, caeli, " id est, Angeli majores, " et qui habitatis in eis, " id est, minores : et dicuntur isti habitare in majoribus, quia recipiunt ab eis illuminationes. Vel, " Laetamini, caeli, " id est, omnes Sancti, qui moramini in talium congregatione. Vel, " Laetamini, caeli, " id est Praelati,

" et qui habitatis in eis, " id est, subditi supple, propter diaboli dejectionem, et Ecclesiae promotionem.

"Vae terrae et mari, quia descendi) diabolus ad vos, habens iram magnam, sciens quod modicum tempus habet. "

Hic agitur de paena malorum.

Et dicuntur duo. Primo, quod expulsus ab electis, coepit amplius saevire in reprobos. Secundo, ostenditur conatus ipsius Ecclesiam impugnantis, ibi, v. 13 : " Et postquam vidit. "

In primo duo facit. Primo, imprecatur reprobis paenam. Secundo, reddit causam, ibi, " Quia descendit diabolus. "