Sermo III .

Item, sermo fratris Bonaventurae Fratribus in Capitulo, Parisius.

Qui descendit ipse est et qui ascendit super omnes caelos, ut impleret omnia, ad Ephesios quarto .

Tria hic notare valemus, scilicet ascendentis praeambulum meritum, ascensionis gloriosum statum et ascensionis fructuosum effectum. Primum, ibi: Qui descendit: secundum, ibi: ipse est et qui ascendit super omnes caelos; tertium, ibi: ut impleret omnia.

Circa totum nota, quod qui vult cum Christo in caelum ascendere, oportet, eum exemplo Christi primo descendere dupliciter, scilicet per recognitionem propriae iniquitatis, per revisionem propriae fragilitatis. Talis enim est, qui ascendit dupliciter, scilicet ad contemplationem altitudinis divinae maiestatis, ad obsecrationem condescensionis divinae pietatis, ut impleat omnia interiora sua dono sapientiae et abundantia gratiae. Et quoniam Apostoli fuerunt tales, ideo adimpleti sunt Spiritu sancto in die Pentecostes.