255. De sancto Germano
Ad Vesperas.

1. Sublime festum saeculis
Indicit annus versilis,
Hymnis resultant sidera,
Plaudunt canore terrea.

2. Germanus admirabilis
Est hujus index luminis,
Quo nemo post apostolos
Alter fuit praestantius.

3. Testatur orbis Italus
Claris frequens virtutibus,
Testatur ecce Gallia
Pollens magistri gloria.

4. Fatetur hoc oceanus
Bis navigando pervius,
Fatetur et Britannia
Erroris unco libera.

5. Eliminati daemones

Clamore coelum concitant,
Non verba, non praesentiam
Tanti ferentes praesulis.

6. Remissa moerent tartara,
Damnisque mors illacrimans,
Caduca dum post funera
Vitae refundit corpora.

7. His te beatum mercibus
Reposcit aether igneus
Fessumque Christus visitans
Invitat ad perennia:

8. Germane, dicens, inclitam,
Triumphum duc in patriam,
Victrice clarus laurea
Super futurus sidera.

9. Quo te, beata trinitas,
Superna laudat civitas,
Laudando cernit affatim,
Cernendo vivit perpetim.