Dicit ergo : " Et vidi unum, " id est, Antichristum, " de capitibus ejus, " id est, de septem principibus, qui per septem capita signantur, in quibus quia excellet Antichristus per malitiam, dicitur unum singulariter. Vel, " Unum de capitibus suis, " id est, Antichristus, qui sic dicitur, quia dicet se esse principium suiipsius : " quasi occisum ", id est, simulatorie, et non vere: quia per artem magicam simulabit se mortuum.

" In mortem. " Hoc addit ne credatur secundum communem usum loqui, quo aliquis occisus dicitur, qui est proximus morti.

" Et plaga mortis ejus, " scilicet, simulatae, " curata est, " scilicet, per resurrectionem simulatam. Simulabit enim mortuum se per triduum, et postea dicet se suscitatum : sed, sicut dicit Beda, totum faciet arte magica, et ministerio daemonum.

"Et admirata est universa terra post bestiam.

Et adoraverunt draconem, qui dedit potestatem bestiae. "

Hic tangitur de efficacia simulationis ejus, quae consistit in duobus: respectu suorum, et respectu sui, quod est ibi, v. 5 : " Et datum est ei os. " Efficacia simulationis in aliis consistit in quatuor. Primo, in gentium admiratione. Secundo, in imitatione, ibi, " Post bestiam. " Tertio, in ejus adoratione, ibi, v. 4 : " Et adoraverunt draconem. " Quarto, in ejus magnificatione, ibidem : a Qui dedit potestatem bestiae. "