Dicit ergo : " Et aperuit os suum, " scilicet, quod ante per tres annos et dimidium quasi clausum tenebat, dum occulte blasphemabat, " in blasphemias, " scilicet apertas, " ad Deum, " scilicet, usque ad Deum. Tunc enim dicet aperte Christum non fuisse Dei Filium, et dicet se esse Christum. .

" Blasphemare nomen ejus, " id est, ad blasphemandum fidem et obedientiam Christi, per quam nominabilis est et laudabilis. Vel, " Nomen ejus, " id est, Jesu, quod est nomen super omne nomen, de quo, Psal. lxxi, 17 : Sit nomen ejus benedictum in saecula. Hoc nomen blasphemabit: quia dicet Christum non fuisse Christum, sed potius Antichristum, et mentietur se Christum.

" Et tabernaculum ejus, " id est, Sanctos in quibus habitat Dominus, sicut milites in tabernaculis, in quibus triumphat. Unde Glossa : " Et tabernaculum ejus, " id est, eos qui sibi militant, id est, Sanctos qui sunt in Ecclesia militanti. Vel, " Tabernaculum ejus, " id est, carnem Christi, de quo, Psal. xlv 5 : Sanctificavit tabernaculum suum Altissimus : in quo deitas latuit, sicut in tabernaculo. Ad Coloss. II, 9 : in ipso inhabitat omnis plenitudo divinitatis corporaliter, id est, vere.

" Et eos qui in caelo habitant, " id est, qui proteguntur a majoribus in Ecclesia, sicut minores : per caelum enim majores. Vel sic : " Et eos qui in caelo habitant, " id est, Sanctos illos qui jam fruuntur Deo in caelo : dicet enim illos fuisse ministros Antichristi, et nullum ante se Christianum.

" Et est datum illi bellum facere cum sanctis, et vincere eos. "

Hic est quarta pars, in qua agitur de usu potestatis suae. Et dicitur hic concessum esse Antichristo punire Sanctos corporaliter.