Dicit ergo : " Et vidi, " id est, intellexi spiritualiter, " aliam bestiam, " id est, Pseudo-Apostolorum congregationem. Et dicitur bestia, quasi vastia, propter crudelitatem.

" Ascendentem, " scilicet, propter superbiam, et transeuntem, " de terra, " id est, de terrenorum opulentia. Haymo : " De terra ascendere, est pro terrenis rebus in superbiam erigi. " Nota : Non dicit quo ascendit, sed unde : quia malorum ascensus est descensus. Psal. lxxii, 18 : Dejecisti eos, dum allevarentur. Nota, quod diabolus revelabit ei thesauros absconditos, unde suos ditabit : et sic erigetur in superbiam. Daniel. XI, 43 : Dominabitur thesaurorum auri et argenti.

" Et habebat cornua duo, " id est, vitam, et scientiam : sed quia non habebit illa secundum veritatem, sed per simulationem : ideo non dicit simpliciter, sed " similia Agni ". Vel, " Duo cornua " sunt doctrina et potestas faciendi miracula per simulationem, non secundum veritatem, et per ea quasi per cornua impugnabunt Ecclesiam. Vel, " Duo cornua, " id est, duo Testamenta, quibus defenditur Ecclesia, quae habebit per scientiae cognitionem, non per vitae sanctitatem : per usurpationem, non secundum veritatem. Unde sequitur : " Similia Agni. " Vel, " Duo cornua similia Agni " sunt dilectio Dei et proximi simulata quae erit in eis. Unde Glossa : " Si quid boni in eis videbitur, simulatio erit. "

" Et loquebatur sicut draco, " id est, Antichristus : quia sicut diabolus loquitur in Antichristo, ita praedicatores Antichristi loquentur a diabolo. Vel, " Sicut draco, " quia persuadendo et blasphemando concordabit draconi.

" Et potestatem prioris bestiae omnem faciebat in conspectu ejus : et fecit terram, et habitantes in ea, adorare bestiam primam, cujus curata est plaga mortis. "

Hic agit de potestate ministrorum Antichristi.

Et dicuntur tria. Primo, quod habebunt potestatem decipiendi per sanctitatis simulationem. Secundo, per miraculorum operationem, ibi, v. 13 : " Et fecit signa. " Tertio, per saecularem potestatem, ibi, v. 15 : " Et faciei ut quicumque, etc. "