Dicit ergo : " Et potestatem prioris bestiae, " id est, Antichristi bestialis et irrationalis, " omnem, " id est, omnes modos decipiendi, quibus Antichristus decipit, decipient isti, " faciebat in conspectu ejus, " id est, Antichristi, hoc est, in beneplacito ejus. Vel, " in conspectu ejus, " scilicet, ut quasi videatur omnia scire. Haymo quaerit, Si praedicatores Antichristi semper in ejus praesentia sint? Et respondet, quod non : sed ideo dicuntur in conspectu ejus potestatem habere, quia ubicumque sint, studebunt ita voluntatem ejus facere, ac si semper ab eo videantur. in conspectu etiam ejus sunt : quia in tantum eum honorabunt, ut quidquid acturi sunt, dicant in conspectu ejus esse, tamquam nihil eum latere possit.

" Et fecit terram, " id est, amatores terrenorum, " et habitantes in ea. " Glossa, in amore terrenorum perseverantes. Vel, " Terram, " id est, corpora terrena, " et habitantes in ea, " id est, animas quiescentes in corporibus, " adorare bestiam primam, " id est, Antichristum qui est caput omnium malorum, quem adorabunt Apostoli sui, sicut Christum adoraverunt veri Apostoli: " cujus curata est plaga mortis, " scilicet, simulate, et per resurrectionem simulatam quam praedicabunt sicut veram.

" Et fecit signa magna, ut etiam ignem faceret de caelo descendere in terram in conspectu hominum. "

Hic determinat potestatem quam habebunt ministri Antichristi per miraculorum operationem.

Et dicuntur tria. Primo, quod miracula facient ad confirmationem praedicationis suae. Secundo, miraculorum expressionem ponit, ibi, " Ut etiam ignem. " Tertio, quod ad majorem deceptionem facient coram Sanctis, ibi, " In conspectu hominum. "