QUAESTIO CLXIII, Utrum B. Virgo habuerit privilegiorum sufficientiam ?

g I.

Post haec quaeritur de privilegiorum sufficientia : quia videtur, quod possint esse plura quam dicta sunt.

Primum enim inter dicta fuit, quod numquam peccavit: quare igitur similiter non habuit unum respectu ignorantiae, vel paenae sicut unum habuit respectu culpae, maxime cum utrumque illorum non fuerit in statu innocentiae, et

videantur utriusque opposita ad innocentiam a culpa pertinere.

Secundum privilegium fuit, quod non potuit peccare. Quaeritur igitur, quare similiter non habuerit unum privile gium respectu paenae, ut quae non posset peccare, non posset puniri, cum tamen omnis paena sit pro culpa : ergo ubi nulla culpa, nulla posset esse paena.

Tertium privilegium fuit, quod quolibet motu merebatur. Quaeritur igitur, quare non habuerit privilegium, ut similiter frueretur sicut ipse Dominus Jesus

Christus, qui similiter unitus fuit carni mort ali?

Quartum privilegium fuit puritas in summo. Cum igitur triplex sit actus hierarchiae, purgare, illuminare, et perficere, et beatissima Virgo habuit privilegium respectu purgationis : ergo debuit habere alia duo, unum respectu illuminationis, aliud respectu perfectionis.

Quintum privilegium fuit Virgo virginum. Cum autem beatissima fuerit, et virgo, et mater, et conjugata, et viduata, et habuerit unum privilegium respectu virginum, videtur quod debuit alia tria habere respectu coniugatarum, matrum et viduarum.

Sextum privilegium fuit mater Dei. Et constat, quod similiter fuit filia Dei, et sponsa Dei, et multa consimilia : ergo respectu eorum debuit habere privilegia multa.

Septimum privilegium fuit mater omnium. Quare similiter non habuit privilegium unum, quod esset soror et filia omnium, vel saltem, quod esset domina omnium ?

Octavum privilegium fuit stella maris. Illud habuit beatissima Virgo respectu maris pro privilegio : ergo et aliud debuit habere respectu ignis, et unum respectu aeris , et unum respectu terrae.

Nonum privilegium fuit porta coeli. Si respectu portae habuit unum privilegium, ergo eadem ratione respectu fundamenti vel parietum deberet habere unum privilegium, ut dicatur lapis angularis vel aliquid hujusmodi.

Decimum privilegium fuit passionis communicatio. Cum igitur privilegium habuerit respectu passionis, etiam habebit aliud respectu actionis, cum actio sit nobilior passione.

Undecimum, privilegium fuit exaltatio. Et si unum habuit respectu ardui: ergo alia duo habebit respectu veri et respectu

Duodecimum privilegium fuit regina misericordiae. Quare non unum respectu potentiae, vel sapientiae, quae miseriq.or-

dia sunt priora ?

Item, Unum aliud privilegium fuit ab aliis omnibus quod erat mater et filia, quod non est determinatum inter alia. Item, Unum videtur, quod habuit virtutes per modum patriae. Item, Unum privilegium videtur, quod potuit mereri et non demereri. Item, Fomitis exstinctio. Item, Quod concepit sine libidine. Item, Quod portavit sine gravedine. Item, Quod peperit sine dolore. Haec sunt multa privilegia : ergo habuit plura quam praedicta. Item, Superius demonstratum est, quod nullius habuit ignorantiam : quod est etiam unum privilegium beatissimae Virginis.

sig. II.

Sufficientia privilegiorum sumitur in hunc modum. Privilegium vel est contra malum, vel ad bonum. Si contra malum, vel contra malum culpae vel poenae. Si poenae, vel poena est praesens vel futura. Auferre autem poenam praesentem non est privilegium, sed nocumentum : quia illa est meritoria. Item, futuram auferre non est privilegium : quia hoc est commune plurium, ut omnium martyrum, et omnium parvulorum, et aliorum multorum perfectorum, tam innocentium, quam paenitentium,qui omnes post istam vitam non sustinent aliquam poenam. Si igitur est contra malum culpae, vel est culpa actualis, vel originalis. Si actualis, sic est peccatum quantum ad actum, et sic est, quod numquam peccavit, nec potuit peccare. Si autem est originalis, sic est puritas in summo.

Si autem est privilegium Ad bonum, vel est ad bonum meriti, vel ad bonum praemii. Si meriti, vel est habitus, vel actus, vel passio. Si habitus, vel est corporis, vel animae. Si corporis, vel in se, vel ad Deum, vel ad proximum. In se,

sic est virgo mater. Ad Deum, sic est mater Dei. Si ad proximum, sic est Virgo virginum. si autem est habitus animae, vel est intellectus, vel affectus. Si intellectus, sic est nullius ignorantia. Si affectus, vel ad Deum, vel ad proximum. Si ad Deum, sic est puritas in summo. si ad proximum, sic est mater omnium. Si autem privilegium est actus, vel est in se, vel ad proximum. Si in se, sic quolibet motu merebatur. Si ad proximum, vel est exemplum, et sic est stella maris : vel ad auxilium, sic est porta coeli. Si autem privilegium est passio, sic est passionis communicatio, Si autem pertinet ad praemium, vel hoc quantum ad rem, et sic est super omnes creaturas exaltatio : vel quantum ad nomen, et sic est regina misericordiae.

Et sic in universo sunt quatuordecim privilegia beatissimae Virginis. Primum est, quod numquam peccavit. Secundum est, quod peccare non potuit. Tertium, quod fuit mater et virgo. Quartum, quod est mater Dei. Quintum, quod est Virgo virginum. Sextum, quod nullius ignorantiae. Septimum, quod est puritas in summo. Octavum, quod est mater omnium. Nonum, quod est quolibet motu mereri. Decimum, quod est stella maris. Undecimum, quod est porta coeli. Duodecimum, passionis comunicatio. Decimum tertium, super omnes creaturas exaltatio. Decimum quartum, quod est regina misericordiae.

Si igitur sunt quatuordecim privilegia beatissimae Virginis, quid est igitur, quod Joannes vult, cum dicit in Apocalypsi, XII, 1, quod vidit mulierem amictam sole, et in capite ejus coronam duodecim stellarum : quod quasi omnes exponunt et praedicant de duodecim privilegiis beatissimae Virginis.

Ad hoc respondemus, quod sicut articuli uno modo sunt duodecim, alio modo sunt quatuordecim, sic est in proposito, possunt enim reduci quatuor decim ad duodecim : ad summam enim puritatem quae sub Deo potest intelligi, reducitur immunitas peccati, et impossibilitas peccandi, quod est summa propinquatio ad puritatem Dei: et ideo ad puritatem in summo reducuntur duo prima : et sic quatuordecim privilegia fiunt duodecim visa in corona mulieris, de qua loquitur Joannes in Apocalypsi, XII, 1.

sig. III.

His visis, respondemus ad objecta. Quod igitur objicitur de fomitis exstinctione, dicimus quod illud claudit in se puritas in summo : sed quaeritur illud, quare et unde fuerit, quod non fuit sine originali labe concepta ? Dicimus quod fuit impossibile, nisi conciperetur de virgine : et sic mater sua fieret virgo mater, et non esset suum privilegium, scilicet quod esset mater virgo, cum hoc matri prius fuisset communicatum .

Item, Frui in via non potuit ei dari privilegium : quia illud creatura divinitati non unita non compatitur secum cum corpore corruptibili et cum poena,

Item, Respectu matrum habuit privilegium, quod fuit mater virgo, et hoc est quod fuit mater Dei.

Item, Quod poterat mereri et non demereri, non est per se privilegium, sed est conclusio duorum privilegiorum. Nam ex puritate in summo sequitur quod non poterat demereri: ex eo autem quod quolibet actu merebatur, sequitur quod poterat mereri.

Item, Nutrix Dei non est per se privilegium, sed privilegii pars quod est mater Dei: ad integritatem enim materni- tatis exigitur non tantum prima materia corporis generandi, sed etiam nutrimentum nutriendi, quod tamen aptum natum est ab alio homine accipi. Unde quoniam alia est nutirix, alia mater, ideo nutrix

est quasi dimidia mater, a qua puer aliquando etiam contrahit multum a complexione influente : ergo ad perfectissimam maternitatem exigitur etiam ratio nutricis : unde cum beata Virgo fuerit perfectissima mater, fuit et nutrix. Unde, Luc. XI, 27 : Beatus venter qui te portavit, et ubera quae suxisti. Et ita sub matre Dei intelligitur nutrix Dei.

Item, Filia Dei vel sponsa Dei non est privilegium : quia esse filiam Dei vel sponsam Dei, nihil addit quod sit speciale ei.

Item, Domina omnium non est privilegium per se, sed includitur in regina misericordiae : omnis enim regina est domina, et non e contra : unde cum beata Virgo sit regina misericordiae, et misericordia sit domina omnium, beata Virgo cum sit regina misericordiae, erit domina omnium.

Item, Quod non datur privilegium respectu terrae, aeris, vel ignis, sed tantum respectu maris, inde est, quia mare proprie exprimit periculum hujus vitae, propter quod indigemus suffragio, vel navigio dirigente nos vel educente.

Item, Quod non dicitur fundamentum vel lapis angularis privilegium, inde est, quia fundamentum proprie respicit fidem, quae a solo Deo est: lapis angularis unionem divinae et humanae naturae.

Item, Quare non habuit privilegium respectu actionis sicut respectu passionis, dicimus, quod habuit id quod quolibet actu meruit, quod sine Deo tamen non potuit facere : quia ipse dicit: Sine me nihil potestis facere . ''Sed adjutores Dei sumus in merendo, sed non in patiendo.

Item, Quod non habuit privilegium respectu boni vel veri sicut respectu ardui, dicimus quod habet: quia illa sua exaltatio non tantum est in arduum, sed in verum et bonum arduum.

Item, Quare non respectu sapientiae vel potentiae sicut respectu misericordiae habuit privilegium, dicimus, quod misericordia includit in se utrumque : unde regina misericordiae est regina potentiae et sapientiae.

Ex his patet, quod privilegia beatissimae Virginis sunt duodecim, et non plura, vel pauciora.