Unde dicit : " Qui, " scilicet virgines, " empti sunt, " scilicet, pretioso sanguine Christi, " de terra, " id est, de infirmitate corporis sunt sursum elevati, ut in carne vivant praeter carnem. Ambrosius : " Supergreditur virginitas conditionem humanae naturae, per quam homines Angelis assimilantur : major enim victoria virginum est quam Angelorum : Angeli enim sine carne vivunt, virgines autem in carne triumphant. "

" Hi sunt qui cum mulieribus non. sunt coinquinati, virgines enim sunt. Hi sequuntur Agnum quocumque ierit. Hi empti sunt ex hominibus, primitiae Deo et Agno :

Et in ore eorum non est inventum mendacium, sine macula enim sunt ante thronum Dei. "

Hic manifestatur virginitatis dignitas tripliciter. Primo, quoad incorruptionem carnis. Secundo, quoad incorruptionem oris, ibi, v. 5 : " Et in ore eorum, etc. " Tertio, quoad incorruptionem mentis, ibidem, " Sine macula sunt. "