Dicit ergo : " Hi sunt, " scilicet, virgines, " qui cum mulieribus non sunt coinquinati, " turpi opere : " virgines enim sunt, " scilicet mente. Haymo : " Non polluti cum mulieribus mente et corpore. "

" Hi sequuntur Agnum, " id est, imitantur. Haymo : " Sequi Christum, est imitari ipsum. "

" Quocumque ierit, " in quacumque via : sive enim vadat ad viam praeceptorum, hi sequuntur : sive ad viam consiliorum, hi sequuntur. Bernardus : " Sequuntur ad redemptionem, sicut omnes :

sequuntur ad praecepta, sicut plures : sequuntur ad consilia, sicut pauci, quia pauci virginitatem servant. "

" Hi empti sunt, " id est, quadam praerogativa ab aliis separati, sicut primitiae eliguntur ex fructibus, vel ex multo grege eligitur agnus. Unde, " Hi empti sunt ex hominibus. " Non dicit simpliciter, empti : quia de caeteris meliores sunt electi. Ergo, " Hi empti sunt, " scilicet, sanguine Christi sui, ad hoc ut essent " primitiae ex hominibus, " id est, electi ex omnibus hominibus ad modum primitiarum, id est, ut tamquam primitiae offerentur " Deo, " id est, Patri. Nota, quod dicit, empti, et non redempti. Nam illi proprie dicuntur empti, qui baptismalem innocentiam servaverunt : redempti vero, qui. a peccatis per paenitentiam redierunt. De primo dicitur, I ad Corinth. VI, 20 : Empti estis, etc. De secundis, I Petri, I, 18 : Non corruptibilibus, etc.

" Et Agno, " id est, Filio.

Sed quaeritur, Quare non dicit: Spiritui sancto, cura sit tribus honor unus? Responsio. Spiritus sanctus est nexus et amor Patris et Filii: et ideo illis simul positis necessario intelligitur Spiritus sanctus.

" Et in ore eorum non est inventum mendacium, etc. "

Hic commendantur virgines quantum ad incorruptionem oris. Sed contra : Psal. cxv, 11 : Omnis homo mendax. Responsio. Sicut dicit inferius, in his invenitur in quibus manet : in habentibus autem charitatem finaliter manet : quia, I Petri, IV, 8 : Charitas operit multitudinem peccatorum. Aliter, Haymo : " Omnis homo quantum est de se, mendax est : in quantum est ex Deo, verax est. "

" Sine macula enim sunt ante thronum Dei, " id est, ante Deum judicem : quod dicitur magis de eis quam de aliis, quia quamvis electi sint sine macula, comparatione tamen aliorum soli virgines carne et mente dicuntur sine macula,

" Et vidi alterum Angelum volantem per medium caeli. "

Supra descripsit exercitum Agni, hic introducuntur praecones vocantes ad partem Agni.

Et dividitur haec pars in duas. In prima, ponitur praeconum clamor. In secunda, clamoris ratio, ibi, v. 14 : " Et vidi, et ecce nubem candidam, etc. "

In prima dicuntur duo. Primo, introducuntur praecones revocantes a parte draconis. Secundo, vocantes ad partem Agni, ibi, v. 13 : " Et audivi vocem. "

Quia vero praecones draconis clamaverunt tria, scilicet, ut bestia adoraretur, ut Geret imago bestiae, ut character ejus reciperetur : ideo contra haec tria triplex ordo Praedicatorum introducitur. Et dividitur haec pars in tres. Primi praedicant ne adoretur bestia : secundi, ne imago bestiae fiat, ibi, v. 8 : " Et alius Angelus : " tertii, ne quis characterem bestiae recipiat, ibi, v. 9 : " Et tertius Angelus. " Primi describuntur primo a vita activa et contemplativa : secundo, ab officio et doctrina, ibi, " Habentem Evangelium aeternum. "