Dicit ergo : " Et alius Angelus, " id est, fidelium coetus, qui sunt alii a Christo, qui signatur per praecedentem. Dicuntur autem fideles Angeli, non natura, sed officio, quia annuntiant dictis et factis Dei voluntatem : de quibus, Isa. XXXIII, 7 : Angeli pacis amare flebunt, scilicet propter peccata populorum.

Nota : Sancti dicuntur Angelus singu- lariter propter concordiam voluntatum. Act. IV, 32 : Multitudinis credentium erat cor unum, etc. Sed alius a Christo, quia ipse Dominus, iste servus.

" Exivit, " id est, exibit, " de templo, " id est, de Ecclesia, quae est templum Dei. i ad Corinth. III, 17 : Templum Dei sanctum est, etc. Exibit, inquam, per manifestationem in die judicii, qui modo latet in Ecclesia. Unde Glossa : " Sancti qui modo latent in Ecclesia occulti, in claritate apparebunt judicaturi. " Et sic acturi exibunt de templo hoc.

cc Clamans voce magna, " id est, magno desiderio et affectu, "ad sedentem super nubem, " id est, ad Christum Ecclesiam regentem et ei praesidentem : " Mitte falcem tuam, " id est, exerce judicium, proferendo sententiam, quae dicitur falx, quia sub ea omnia cadunt quae incidit, sicut sub falce : " et mete, " id est, collige tuos in horreum, et malos mitte in gehennam : " quia venit hora ut metatur, " id est, completus est numerus Sanctorum : " quoniam aruit . messis terrae. " Messis est consummatio saeculi, sicut dicit Dominus, Matth.XIII, 39 : Messis vero, consummatio saeculi est. Haec messis arida est : quia in consummatione saeculi multa erit ariditas, et quoniam abundavit iniquitas, refrigescet charitas multorum . Et ideo loquendo de fine saeculi, ait: " Aruit messis, " quia aestu vitiorum abundante, et humore gratiae deficiente, consummatio saeculi arida erit. Et dicit "messis terrae, " ad signandum, quod ariditas quae est ex defectu humoris gratiae et per aestum abundantis malitiae in . terrenis est, qui ad modum messis radicem affectus posuerunt in terrenis.

Unde sensus est:" Quoniam aruit messis terrae, " id est, consummatio saeculi, vel consummata est malitia saeculi.

" Et misit qui sedebat super nubem,"

Id est, Christus Ecclesiae praesidens, vel Christus Deus sedens super humanam naturam sibi unitam et elevatam ad modum nubis, " falcem suam in terram, " id est, exercuit judiciariam potestatem. " Et demessa est terra, " id est, protulit scientiam contra terrenos, et separavit bonos ab eis. Vel sic : " Et demessa est terra, " id est congregavit in unum locum ad disceptandum cum eis, et separandum bonos a malis. Joel, III, 2 : Congregabo omnes gentes in valle Josaphat, etc.

" Et alius Angelus exivit de templo quod est in caelo, habens et ipse falcem acutam.

Et alius Angelus exivit de altari, qui habebat potestatem supra ignem : et clamavit voce magna ad eum qui habebat falcem acutam, dicens : Mitte falcem tuam acutam, et vindemia botros vineae terrae, quoniam maturae sunt uvae ejus. "

Hic ostendit, quod Sancti cum Christo judicabunt.