Dicit ergo : " Et alius Angelus, " id est, Christus qui est alius a Sanctis, " exivit, " scilicet per manifestationem, " de altari, " id est, de loco secretiori quam alii Sancti, sicut dicit Glossa.

" Qui habebat potestatem super ignem, " id est, super paenam aeternam. Matth. x, 28 : Qui potest animam et corpus mittere in gehennam.

" Et clamavit voce magna, " id est, auctoritate imperandi, ". ad eum, " scilicet Sanctos, " qui habebat falcem acutam, " id est, potestatem judiciariam. " Dicens : Mitte falcem tuam, " id est, exerce judicium ut fiat resecatio malorum.

Unde sequitur: " Et vindemia botros vineae terrae. " Per vineam intelligitur hominum collectio, vel pluralitas : per botros opera quae praecipiuntur vindemiari, quia per illa merentur puniri homines.

Est ergo sensus : " Et vindemia botrosvineae terrae, " id est, omnes reprobos ponentes spem suam in terrenis propter mala eorum opera: " quoniam maturae sunt uvae ejus. " Beda, id est, consummata sunt peccata.

" Et misit Angelus falcem suam acutam in terram, et vindemiavit vineam terrae, et misit in lacum irae magnum :

Et calcatus est lacus extra civitatem. "

Hic ostenditur Sanctorum obedientia.

Et dicuntur quinque. Primo, ponitur obedientia Sanctorum : secundo, punitio malorum, ibi, " Et misit in lacum. " Tertio, ostenditur modus punitionis, ibi, v. 20 : " Et calcatus est lacus. " Quarto, qui sunt puniendi, ibidem, " Et exivit sanguis. " Quinto, quod erit diversitas in paenis, ibidem, " Per stadia mille. "