302. De sancto Laurentio.
Ad Vesperas.

1. Gloriosi Laurentii
Laeti laudes attollimus,
Quem per tormenta Decii
Laureatum agnovimus.

2. Dum thesaurus exquiritur
Dispersus in pauperibus,
Martyr carcere clauditur
Signis fulgens insignibus.

3. Quibus visis Hippolytus
Credit et cum familia,
Hinc tormentis expositus
Ridens pertransit munia.

4. Demum assatur ignibus
Invicta manens hostia
Sicque fragrans odoribus
Receptus est in gloria.

5. Laurenti, martyr inclite,
In fide manens stabilis,
Laudibus tibi subditae
Plebi esto placabilis.

6. Lauri viror constantiam
Signat in Christi milite,
Sed fructus abundantiam
Pietatis exhibitae.

7. Granum sinapis teritur
Fragrat odor mirabilis,
Non cedit, quo plus caeditur,
Sed permanet immobilis.

8. Inflammato interius
Sancti spiritus flamine,
Rorem praestant exterius
Prunae vernantes sanguine.

9. Sit laus patri et filio
Cum utriusque flamine,
Qui nos mundans a vitio
Ornet virtutum culmine.