Scholium.

Secunda conclusio, corpus Christi in Eucharistia posse moveri primo motu proprie a Deo ; ratio, quia habet dispositiones requisitas ad recipiendas formas illorum quatuor generum, quia habet omnia absoluta quae habet in coelo. Tertia conclusio, potest corpus ut hic moveri motu, largo modo, primo, seu immediate, quia ad motum hostiae acquirit novas praesentias, quas non habet, ut in coelo.

Secunda conclusio probatur, per quartam rationem factam ad primam partem, quia omnem dispositionem necessariam ad recipiendum calorem habet corpus Christi ut hic, quam habet ut in coelo: ergo si ut hic, non repugnat recipere calorem, esto per possibile vel impossibile, quod nusquam alibi esset, et per consequens cum virtus divina omnem formam posset imprimere passo, cujus passum est receptivum, sequitur quod Deus potest corpus suum ut hic transmutare primo ad calorem.

Tertia conclusio patet, quia tenemus, quod post consecrationem ubicumque hostia, ibi vere est corpus Christi; ergo propter praesentiam uniformem corporis ad hostiam, quae hostia habet aliam et aliam praesentiam localem primo, ad aliud et aliud continens, sequitur quod corpus Christi habeat aliam et aliam praesentiam, ad. aliud et aliud continens. Hic autem alia et alia praesentia non est sine mutatione sic extensive sumpta ; et isto modo inest primo corpori, ut hic, quia nullo modo corpus Christi, ut in coelo, habet istam praesentiam, imo neutram.

Et si quaeras, possetne habere aliam et aliam praesentiam, et non tantum respectu continentis, scilicet speciei, ita quod esset praesentialitas respectu continentis speciem, licet respectu speciei non haberet aliam praesentiam, et inciperet habere novam praesentiam respectu alterius?

Dico, quod non est simpliciter necessarium illud corpus esse praesens speciei, sed tantum ex ordinatione divina, de qua certificavit Ecclesiam. Posset ergo Deus de potentia absoluta facere corpus suum non esse praesens speciei, isto modo, manente specie, et facere ipsum isto modo praesens aeri circumstanti hostiam, et etiam successive nunc uni parti aeris, nunc alteri, et sic transferre corpus de loco hostiae, usque ad quamcumque partem universi, et semper sub eodem modo existendi, non localiter cum alio corpore replente locum.