358. De sancto Mario.
Ad Nocturnum.

1. Sacri triumphale tui,
Christi bellator inclite,
Quo arma, fides et crucis,
Trophaeum vernat proelii,

2. Mysticis canora modis
Turba laudesque concinit,
O Mari, lux, vita, decus,
Apostolorum particeps.

3. Petri coronaris fide
Paulique dogma nobile,
Sacro unguente unguine
Sancto muniris spiritu.

4. Austremonium praesulem,
Veterinum presbyterum,
Mamertum archidiaconum
Christo libasti victimam.

5. Coelo locans substantiam,
Aerugo quam non devorat,
Gentes trahens ad gratiam
Sacra talenta duplicas.

6. Tu elementum liquidum
Siccis calcans vestigiis
Liberos reddis patriae
Aequoris morti deditos.

7. His ita gestis inclitus,
Almo repletus flamine,
Insignem coronam gerens
Vitae nitescis praemio.

8. Suscipe vota precantum
Peccatorum, egregie
Verbi coelestis amator
Et doctor evangelice.

9. Doxa patri ingenito
Ejusque unigenito,
Amborum sacro flamini
Pollenti nutu perpeti.