383. De sancto Mellono.
Ad Vesp. et Laud.

1. Hymnum vocis personemus
cum cordis concordia,

Corda nostra conformemus
Cum vocis harmonia,

Ne psallendo discordemus
Tendentes in varia.

2. Ut Melloni corde mundo
Colamus solemnia,
Quem elegit ex hoc mundo

Dei providentia,
Ut hunc mundi de profundo
Transferret ad gaudia.

3. Baptizatus, ordinatus
A summo pontifice,
Ab angelo praesulatus

Honorem mirifice
Recipiens, primas datus
Est genti Normanniae.

4. Rotomagi constitutus

Praesul Christum praedicat,
Fulget signis, fatur mutus,

Lux in caecis emicat,
Christum vitam assecutus

Defunctus glorificat.

5. Claudi surgunt, et curatur

Quaelibet infirmitas,
Ejus verbo religatur

Daemonis improbitas,
Plebs in fide baptizatur,

Cedit infidelitas.
6. Ferro cinctus singulari

Pastus est cum fluvio
Pane, coeli confortari

Promeruit nuntio
Et a Christo coronari

In coeli palatio.

7. O Mellone, doctor bone,

Concivis angelice,
Destitutos in agone

Mundi clemens adspice
Et coelestis nos coronae

Participes effice.
8. Laus et honor sit gignenti

Personae cum filio,
Ab utroque procedenti

Laus et jubilatio,
Sine fine permanenti

Et absque principio.