MEMBRUM V.

Quid fiat de corporibus assumptis post ministerium expletum, utrum redeant in praejacentem materiam ?

Quinto quaeritur, Quid fiat de corporibus assumptis post ministerium expletum ?

Et dicit Beda in libro de Natura rerum, quod missi in ministeria corpora sumunt, et eodem ministerio expleto deponunt.

Et sic videtur, quod corporibus utuntur ut habitibus.

1. Habitus autem post depositionem integri manent. Ergo videtur, quod corpora assumpta ab Angelis et deposita, integra et salvata manent in figuris organorum.

2. Adhuc, Habitum est, quod spissant ea et solida faciunt: spissum autem et solidum post depositionem etiam retinet figuram: quia ex spissitudine et soliditate confortatur in eo potentia tenendi formam et figuram: videtur ergo, quod corpora deposita ab Angelis, in formis suis manent et figuris.

Sed contra hoc est, quod

1. Sicut dicit Beda, Figura corporum in quibus apparuit Deus, expleto ministerio, resoluta fuit in praejacentem materiam, sicut columba in qua apparuit Spiritus sanctus , et stella quae indere apparuit, et duxit Magos . Ergo multo magis corpora in quibus apparent Angeli, peracto ministerio resolvenda sunt in praejacentem materiam.

2. Adhuc, Si manerent, ubi manerent, vel ad quid manerent ? Si enim ex aere sunt, ut dicit auctoritas, non habent locum connaturalem ubi manerent, nisi aerem: et sic a quibusdam viderentur.

3. Adhuc Fortior est unio animae ad corpus cui naturaliter unitur, quam Angeli ad corpus assumptum: sed corpus quod unitur animae, exuta anima a corpore, statim resolvitur. Dicit enim Ari- stoteles in fine primi de Anima, quod egrediente anima marcescit corpus et exspirat. Ergo multo magis corpus Angeli resolvitur postquam ab Angelo depositum est.

Solutio. Dicendum, quod corpus Angeli resolvitur in praejacentem materiam peracto ministerio. Praejacens autem materia aer est tenuis, non tenens figuram in quam resolvitur corpus Angeli, et disparet. Et hujus causa est, quia spissans est continens corpus non est aliqua natura vel qualitas naturalis quae sit in ipso corpore assumpto, sed ex virtute Angeli assumentis corpus continetur: et ideo relictum ab Angelo non habet quo spissetur et quo contineatur, et consequenter ex virtute elementali quae in ipso est, in tenuem aerem resolvitur et disparet.

Ad primum ergo dicendum, quod habitus figuram retinent: quia in se habent potentiam sicci et duri quibus in eis confortatur potentia tenendi figuras quas receperunt. Et contrarium eorum est per naturam in corpore Angeli, humidum scilicet, quod proprio termino non terminatur, et spiritualis raritas, quae nihil tenet sibi impressum, nec tenet Angelorum figuram, et propterea statim resolvitur depositum ab Angelo.

Ad aliud dicendum, quod spissum non tenet figuram, nisi principia potentiae solidi et spissi radicentur in ipso spisso per naturales qualitates. Jam autem dictum est, quod sic non est in corporibus Angelorum: et ideo resolvuntur.

Ea quae objiciuntur in contrarium, procedunt.