Scholium.

Ostenso, materiam conversionis in corpus esse panem triticeum, movet tria dubia. Primum, an amidum sit materia ? et resolvit nihil esse certum, praeter hoc quod utens eo peccaret, nisi ignorantia excusaretur. Negat D. Thom. hic q. 2. art. 2. aiunt Palud. q. 1. art. 4. Sotus d. 9. q. 1. art 3. panem et vinum esse materiam. Habetur ex Matth. 26. et definitur in Lateranen. cap. Firmiter, de Sum. Trinit. Flor. decret. Eugen. Trident. sess. 13. 21. et 22. Quod panis debeat esse triticeus docet Florent, ibidem.

Sed (a) hic est dubium, primo de amido, an ex ipso possit formari panis consecramus. Secundo. an de farina triticea pasta confecta, non cocta possit confici. Tertio, an panis azymus, vel fermentatus, vel uterque.

Quantum ad primum, videretur prima facie, quod talis panis esset consecrabilis; tum quia ille usualiter reputatur panis triticeus, et Christus instituit Sacramentum in pane triticeo usuali; tum quia illae depurationes, quae fiunt circa amidum praeparandum, non videntur alterare a specie farinae triticeae: non enim fiunt ibi, nisi decoiationes et purgationes, et hujusmodi ; haec autem non videntur alterare medullam tritici a specie sua.

Sed si credatur expertis in rebus de qualitatibus consequentibus eas, quae innotescunt ex operationibus, per quas qualitates cognoscimus et distinguimus substantias, aliter enim non cognoscimus distinctionem ignis ab aqua, nisi per ea quae innotescunt nobis ex operationibus ; et secundum Medicos quaelibet species habet qualitatem et operationem a tota specie, quae non competit sibi per talem mixtionem, sed consequitur formam propriam talis speciei, et hujusmodi quantitas, et operatio alia est in tota specie amido, et alia in pane triticeo, sicut apparet cernentibus eas, et assignantibus proprietates tales et tales quantum ad effectus: ex quo videtur quod amidum sit totaliter alterius speciei a pane triticeo. Et confirmamur istud : non enim per aliud probamus acetum et agrestam differre specie a vino, et per consequens non esse materiam consecrationis quantum ad vinum, nisi quantum ad qualitates et operationes, quia scilicet acetum est a tota specie frigidum: vinum autem a tota specie calidum.

Hic breviter potest dici, quod cum certum sit farinam tritici purgatam secundum communem purgationem, eo modo scilicet quo pistores solent eam purgare, esse materiam convenientem ad faciendum panem consecrabilem, et dubium sit,an amidum sit hujusmodi materia, et pars negativa multum sit probabilior, non sine peccato aliquis se exponit tali dubio, maxime ille qui praeparat hostias consecrandis, quia sibi simpliciter est certum, quod de tali materia praeparat. Utens forte potest magis excusari de peccato, quia supponit talem materiam esse bene praeparatam. Sed si in veritate non est ista materia consecrabilis, in consecrando nihil facit. Nec tamen est idololatria, nec occasio idololatriae populo, quia quantum in se est, supponit materiam esse idoneam. et a se et ab aliis adorandam.