Albert the Great, Commentarii In Psalmos

Dicit ergo : " Dixit injustus, " id est, gens injustorum. Ponitur singulare et individuum generis pro genere simpliciter. Exod. x, 19 : Et arreptam locustam projecit in mare Rubrum. " In semetipso, " in corde deliberando statuit, " ut delinquat, " in actu postea exteriori. Ecce illud, Prov. XXIV, 9: Cogitatio stulti peccatum est. Et illud, Matth .XV, 19 : De corde exeunt cogitationes malae, homicidia, adulteria, fornicationes, furia, etc. Et " in semetipso dixit, " in corde scilicet, ubi Deus videt, non in ore, ne apud homines erubesceret. Ad Ephes. v, 12 : Quae autem in occulto fiunt ab ipsis, turpe est dicere. " Non est timor Dei ante oculos ejus. " Ecce privatio timoris, quae debet esse in irascibili. Jerem. v, 22 : Me ergo non timebitis, ait Dominus : et a facie mea non dolebitis ?

Vel aliter : Dicunt peccatores, quod peccant ex fato, aut propter constellationem, aut propter divinam permissionem: sed non est ita : imo " injustus dixit in corde suo, " imo proposuit et voluit, " ut delinqueret, " hoc est, sui delicti sua voluntas causa fuit, non aliud, ut scilicet Deum derelinqueret, et ipsum nihil impulit. Jerem. ii, 31 : Numquid solitudo factus sumlsraeli, aut terra serotina ? Quare ergo dixit populus meus : Recessimus, non veniemus ultra ad te ? Et ex hoc quod sic dixit, patet, " quia non est timor Dei ante oculos ejus. " Malach. I, 6 : Si ego sum Dominus, ubi est timor meus ? Psal. xxxv, 2 : Non est timor Dei ante oculos ejus. Ideo, Psal. x sec. Hebr. 8 : Inquinatae sunt vim illius in omni tempore. .

Et nota, quod detestabile sit proponere peccare antequam surgat tentatio. Item, horribile, stultum, et iniquum. Horribile, quia inter omnia peccata horribilius est homicidium corporale. Magis autem horribile si sit propinquus sanguine, sicut frater, aut pater. Sed super omnia horribile se in anima occidere, maxime quia quanto anima melior est quam corpus, tanto horribilius est occidere animam quam corpus. Et Sap. XVI, 11: Homo oc-cidit per malitiam animam suam. Item, stultissimum, quia facis te peccare antequam pecces : potes enim pervenire ad hoc sine hoc damnoso proposito. Eccli. vii, 8 : Neque, tibi scilicet, alliges duplicia peccata : nec enim in uno eris immunis. Propter hoc dicitur, Prov. XXIV, 8 : Qui cogitat mala facere, stultus vocabitur. Item, iniquum valde et maxime malitia plenum : anima enim antequam peccet, est tamquam ager plenus semine optimo virtutum et gratiarum. Non est autem major malignitas quam superseminare scienter super bono semine zizania vitiorum. Matth. xiii, 27 et 28 : Domine, nonne bonum semen seminasti in agro tuo ? Unde ergo habet zizania ? Et ait illis : Inimicus homo hoc fecit.

" Quoniam dolose egit. " Ecce tertium, in quo arguit ignorantiam affectatam, quia scienter vult ignorare mala propria, et ex se esse mala : unde dicuntur duo secundum litteram Augustini. Primo, dolosa inquisitio ejus qui non vult invenire. Secundo, de quo inquisitio illa, ibi, " Ut inveniatur. "

Ait enim : Nunc " timor Dei non est in conspectu ejus, quoniam dolose egit in conspectu ejus, " id est, Dei : quod nullo modo faceret si timeret ipsum. Eccli. ii, 20 : Qui timent Dominum, praeparabunt corda sua. Sed in quo agit dolum? In hoc ut non inveniret iniquitatem, id est, ne inquirendo iniquitatem suam, odisset inventam. Quasi diceret : Noluit diligenter inquirere iniquitatem suam, ut sic ulterius odiret inventam : sed voluit ignorare ipsam. Augustinus : " Quaerunt: Quare ? Ut inve-" niant, cum tamen nolint inventam re-" linquere. In dolore inquisierunt scire " peccata multi, sed cum sciunt, quod " non possunt ignorare, tunc defendunt. " Michae. vii, 2 et 3 : Vir fratrem suum ad mortem venatur : malum manuum suarum dicant bonum. Isa. v, 20 : Vae qui dicitis bonum malum, et malum bonum.

Secundum nostram litteram sic : " Non est timor in conspectu ejus. " Quod patet per hoc, " Quoniam dolose egit in conspectu ejus, " id est, studere neglexit in Scripturis, et legere, et subterfugit, ut sic " inveniatur iniquitas ejus ad odium, " id est, ad odiendum. Et est hic argumentum, quantum malum sit negligere studium Scripturarum. Aliter enim nequaquam oditur peccatum, quia aliter non cognoscitur. Ad Rom. VII, 7 : Peccatum non cognovi nisi per legem. Est enim per legem peccati cognitio. In eodem peccato est, qui si studere vel nesciat vel non valeat, non vult audire, ne cognoscat miserias suas. Isa. xxx, 10 : Loquimini placentia nobis, scilicet, nolite indicare nobis quae requisita sunt. Gregorius : " Qui " resecat vitia, odium malorum gravat. " Talibus dicit Paulus, 1 ad Corinth. XIV, 37 et 38 : Domini sunt mandata. Si quis autem ignorat, ignorabitur.

Vel sic : Timor Domini non est ante oculos ejus, qui proponit in corde peccare. Quod patet : " Quoniam dolose egit in conspectu ejus, " scilicet Dei, simulando se servire Deo, et servit mundo, vel carni. Ad Rom. XVI, 18 : Hujuscemodi Christo Domino nostro non serviunt, sed suo ventri. Et vere dolus est in conspectu Dei ista duplicitas. Job, xiii, 9: Numquid... placebit ei quem celare nihil potest ? Vel, " in conspectu ejus, " id est, suiipsius. Bene enim videt et intelligit quod dolose agit, intantum, " ut inveniatur iniquitas ejus ad odium, " id est, ut videat iniquitatem suam esse odibilem, non oderit tamen, etsi sciat Deo esse odibilem.

" Verba oris ejus. " Hic redarguit mala iniquorum in specie, et primo peccatum oris. Secundo, cordis, ibi, " Noluit intelligere. " Tertio, operis, ibi, " Adstitit omni viae non bonae. "