480 Acta Apostolicae Sedis - Commentarium Officiale

VI

Templum beato Lamberto dicatum in urbe Düsseldorf, in archidioecesi

Coloniensi, ad gradum Basilicae Minoris evehitur.

PAULUS P P . VI

Ad perpetuam rei memoriam. - Quandoquidem sanctorum caelitum

cultus, si inculpata fide atque pietate nitatur, in Deum ipsum recidit,

cuius egregii illi viri, et amici fidi fuerunt, et gloriam haud inanem

quaesiverunt, et iussa fecerunt diligentissime, idcirco Ecclesia catho-

lica, tametsi plane scit in uno Christo spes obtinendae salutis esse

collocandas, venerationem tamen Sanctorum neque neglexit per homi-

num aetates, et, quoad potuit, auxit, cum ea religio praesidii multum

habeat, et decoris, et levaminis in adversis. Quam ob rem, cum Vene-

rabilis Frater Noster Iosephus S. R. E. Cardinalis Höffner, Archiepisco-

pus Coloniensis, Litteris ad Nos datis die duodetricesimo mensis Mai, hoc

anno, id a Nobis efflagitavisset, ut templum Sancto Lamberto sacrum,

quod est in urbe Dusseldorf, in sua archidioecesi, Basilicis Minoribus

annumeraretur : sacram enim illam aedem esse opere nobilissimam et

religione sanctissimam, qua et memoriae Sanctorum insignes contine-

rentur, et egregia artis monumenta, in quaque pietas in Deum in eius-

que Sanctis summe coleretur; Nos re bene reputata, admotae expostu-

lationi libentissime concedimus. Quapropter, iis probatis, quae Sacra

Congregatio pro Cultu Divino egerit, placet templum Sancti Lamberti,

quod in urbe Düsseldorf exstat, Basilicis Minoribus accenseatur, cum

iuribus atque liturgicis concessionibus rite competentibus, servatis vero

iis, quae iuxta Decretum die vi Iunii datum, anno MDCCCCLXVIII, ser-

vanda sunt. Ceterum volumus, ut hae Litterae Nostrae sive nunc sive

in posterum vim suam habeant, contrariis nihil obstantibus.

Datum Romae, apud S. Petrum, sub Anulo Piscatoris, die x x v

mensis Iulii, anno MDCCCCLXXIV, Pontificatus Nostri duodecimo.

IOANNES Card. VILLOT, Secretarius Status

Loco 83 Sigilli

In Secret. Status tab., n. 268895.