QUAESTIO II.

Utrum quilibet Sacerdos proferens verba consecrationis cum intentione debita, et circa materiam convenientem possit conficere Eucharistiam 1

Alensis 4. part. g. 35, memb. 4. 5. 6. D. Bonav. hic art. 1. 5. 1. Richard. art. 1. q. 1. D. Thom. 3. p. q. 82. art. 1. Suarez 3. part. tom. 3. disp. 61. sed. 3. Bellarm. lib. 4. de Eucharist. c. 16. Waldens. de Sacram. c. 7. et 27.

Ad secundum (a) sic proceditur : Arguo quod non quilibet Sacerdos potest conficere Eucharistiam, per illud, 1. quaest. 1. Multi saecularium, ubi adducitur illud Malach. 2. Maledicam benedictionibus vestris; et exponitur uno modo : Maledicam quidquid a vobis benedicitur ; et fit illa comminatio malis Sacerdotibus: ergo quidquid ab eis benedicitur, a Deo maledicitur, et per consequens nihil simpliciter per ministerium eorum benedicitur.

Item ibidem, 1. quaest. 1. Quod quidam, sig. opponitur : suspenso vel deposito Sacerdote nulla ei relinquitur potestasi ergo, etc.

Item, virtus Missae in Sacramento Eucharistiae principaliter consistit ; ergo si malus Sacerdos potest conficere, sicut bonus, aeque valeret missa mali, sicut boni, et e converso.

Item, laicus potest sumere Eucharistiam ; sed sumptio est finis consecrationis, et per consequens est simpliciter melius et nobilius: ergo aeque vel magis potest laicus conficere ; non ergo solus Sacerdos.

Item, beatus Laurentius sanguinem dispensavit, ut patet ex verbis ejus ad Sixtum, Cui commisisti, etc. et hoc probatur per illud dist. 93. praesente Presbyslero Diaconus Eucharistiam corporis Christi, si necessitas cogit, jussus eroget.

Contra, 1. q. 1. Quod quidam, nulla causa ostenditur, cur ille qui Baptismum non potest amittere, jus amittere possit baptizandi; ergo a simili, qui ordinem sacerdotalem amittere non potest, nec jus conficiendi amittere potest; sed nullus Sacerdos potest amittere potestatem sacerdotalem, quia character est indelebilis ; ergo, etc.

Item, ibidem sig. de his : Sacramentorum sanctitatem in perversis hominibus, sive qui intus sunt, sive qui foris, constat impollutam atque inviolabilem permanere; ergo quicumque Sacerdos quantumcumque malus potes habere sanctitatem Sacramento rum eamdem cum bono.

Quod etiam solus Sacerdos possit tam consecrare quam dispensare, probatur sic per illud dist. 93. Non oportet Diaconos panem dare, id est, corpus Domini, secundum Glossam.