QUAESTIO II.

De divisione sacrificii.

Multiplex est divisio sacrificii: primo a statu et lege triplex est, nam aliud est legis naturae, aliud veteris, aliud novae. Sacrificium legis naturae non habebat effectum aliquem, nisi ex opere operantis ratione fidei, qua erat impetratorium vel satisfactorium Deo. Sacrificia legalia addunt, quod tollebant irregularitates, seu immunditias legales. Sacrificium novae legis habet proprium effectum, de quo infra.

Secundo, dividitur sacrificium ex parte i materiae, seu rei oblatae: primo, offerebantur viventia animalia, et hoc sacrificium dicebatur hostia, vel quia pro victoria ab hostibus impetranda, vel in gratiarum actionem de jam parta offerebatur, et ideo derivatum putant ab hoste ; alii ab ostio, quia in ostio templi offerebantur ; dicebantur etiam victimae, vel a victoria, vel a vinciendo. Secundo, offerebantur sacrificia de fructibus terrae, et haec dicebantur immolationes a mola. Tertio, offerebantur liquores, ut vinum, et hujusmodi, et haec dicebantur libamina: videatur Isidorus lib. 6. Orig. Haec omnia confunduntur, et pro eodem sumuntur apud auctores passim.

Tertia divisio sumitur ex forma offerendi, quae triplex in genere est: interdum enim tota res oblata consumebatur igne, et sic vocabatur holocaustum, quod verbum juxta proprietatem Hebraicam idem significat quod ascendens, quasi in odorem et fumum penitus resolutum ; Isidorus existimat idem deduci a Graeco, qua-, si totum incensum. Secundo, sacrificium partim igne consumebatur, partim cedebat in usum et cibum Sacerdotum, quem vel in templo, vel in atrio comedebant, et dicebatur hostia pro peccato. Tertio, aliud sacrificium partim igne, partim Sacerdotibus, partim etiam ipsis offerentibus cedebat, et dicebatur hostia pacifica.

Alia divisio est in cruentum et incruentum, illud cum sanguine, hoc autem sine sanguine fiebat. Alia divisio sacrificii est ex parte finis, nam ad significandum Dei excellentiam offerebatur ; et hoc erat perfectissimum sacrificium, et vocabatur holocaustum, ideoque totum igne consumebatur, ut significaretur totam creaturam ad Deum spectare. Aliud, hostia pro peccatis dicebatur, quia pro satisfactione peccatorum, et pro peccatis diversis diversa sacrificia offerebantur, ut constat ex lege. Tertium, erat hostia pacifica, vel pro impetrandis, aut impetratis beneficiis fiebat, et dicebatur sacrificium laudis et gratiarum actionis, aut impetratorium. Videri potest D. Thomas 1. 2. quaest. 102. cum aliis expositoribus in Leviticum.