MEMBRUM II.

Si convenit Angelo personalis discretio, secundum quam rationem ei conveniat ?

Secundo, Si convenit Angelo personalis discretio, quaeritur, secundum quam rationem ei conveniat ?

Sunt enim quatuor rationes personae.

Una est, secundum quod personae dicuntur quae repraesentantur in theatris, quando facta heroum recitantur vel cantantur a comoedis et tragoedis: sicut circum ligatur ab aliquo facies sive larva similis faciei Hectoris, vel Hecubae, et cantantur facta heroica illius. Et sic persona accipitur in poetis. Propter quod etiam dicit Boetius in libro de Duabus naturis in una persona Christi, quod debet pronuntiari media circumflexa, eo quod inter os poetae cantantis, et figuram oris larvae per quod cantat, cantus fieri non potest nisi accentu circumflexo et spiritu. Hoc modo persona non potest accipi in Angelis, nisi forte quando assumunt corpora: sed nos hic de tali discretione personali non loquimur, sed potius de illa qua quilibet Angelus ab alio discreta persona monstratur.

Est et alia ratio personae quam ponit Boetius in libro de Duabus naturis in una persona Christi, quod " persona est rationalis naturae hypostasis sive substantia individua. " Et secundum hanc iterum videtur personalitas non convenire Angelo: quia secundum Philosophum, principium individuationis est haec materia, et collectio accidentium quae in alio inveniri non possunt: inter quae (sicut dicit Boetius) praecipuum est distinctio per locum: quia individuum sic est hic, quod non est alibi: et sic est hic, quod aliud non est secum in eodem loco. Propter quod etiam Philosophus dicit, quod " distincta subjecto, sunt distincta loco. " Igitur secundum hanc rationem personalitas non convenit Angelo.

Est iterum ratio personae quam dat Richardus in libro de Trinitate, dicens, quod " persona est existens per se solum secundum quemdam singularis existentiae modum. " Et secundum hanc rationem iterum non videtur personalitas convenire Angelo: quia secundum Richardum, existens est quod ex alio quodam sui generis secundum causalitatem vel principii rationem procedit, ut Deus ex Deo, et homo ex homine. Et talis processus originis non convenit Angelis, ut praeostensum est.

Est et ratio personae in civilibus, quod persona est hypostasis sive substantia individua insignata ad dignitatem pertinente. Et secundum hanc rationem iterum non convenit discretio personalis Angelis: quia secundum hoc non quilibet Angelus esset persona, sed tantum illi qui in sublimioribus officiis et ordinibus constituti sunt ordine hierarchico: et hoc falsum est.

Solutio. Dicendum, quod secundum quamlibet rationum inductarum, Angelo convenit personalitas. Dictum est enim in membro praecedenti hujus quaestionis, quod discretionem personalem facit individuatio naturae communis, quae significatur cum dicitur, quod Angelus est spiritualis et intellectualis natura super id quod est, quod est suppositum et res naturae ejusdem, eductum de non esse ad esse per creationem. Sed proprietates incommunicabiles, quae sic sunt unius, quod non alterius, ostendunt unum discretum esse ab alio: quae cum accipiantur ex officiis et actibus et gratiis Angelorum singularibus, sunt sicut facies sive larva circumligata in theatro, quae unum singularem Angelum secundum discretum esse demonstrant.

Similiter cum ex illo individuus An-

gelus ab omnibus aliis divisus, ab hoc communi quod est spiritualis naturae intellectualis, sicut suppositum demonstretur, secundum discretum esse suppositi erit Angelus secundum rationem secundam personae: erit enim rationalis naturae substantia individua. Sed verum est, quod principium individuationis in eis non est materia, sed id quod est sub quadam convenientia ad materiam, de qua in membro praecedenti istius quaestionis dictum est.

Secundum tertiam autem rationem Richardi, si existens refertur ad rationem originis secundum quod unum originatur ad aliud sui generis, personalitas non convenit Angelis. Si autem referatur ad principia essentialia, quae sunt quod est et quo est, secundum quod dicitur existens vere ens in natura ex quo est determinato ad quod est, ex. qua determinatione discretum esse accipit, nihil prohibet etiam secundum illam rationem personalitatem etiam convenire Angelo: sic enim quilibet Angelus secundum se est existens per se solum secundum quemdam singularis existentiae modum.

Secundum quartam rationem, qua persona nomen civile est, scilicet proprietas ad dignitatem pertinens, si sumitur ab officio, tunc secundum eam non generaliter personalitas convenit Angelo. Si autem sumitur a natura, secundum quod dicimus, quod dignissima creaturarum est natura spiritualis et intellectualis, quae propria efficitur ex individuatione sui super id quod est: tunc etiam secundum eam personalitas convenit omni Angelo.

Et per hoc patet solutio ad totum.

Quod enim quidam quaerunt, Utrum Angeli differant solum numero, vel genere, vel specie ad invicem ? Jam in praehabitis in quaestione de differentia Angelorum ab invicem, a nobis determinatum est .