Albert the Great, Commentarii In Psalmos

Dicit ergo sic : " Quemadmodum cervus, D extracto de caverna serpente venenoso aestuans, et renovationem quaerens, " desiderat ad fontes aquarum, " scit enim cum ad illum venerit quod ab illo liberabitur : "ita, " dicit catechumenus, " anima mea, " jam extracto de terra cordis peccato, per confessionem, quod serpens est. Eccli. XXI, 2 : Quasi a facie colubri fuge peccata, " desiderat ad te, Deus, " scilicet ad tuum sacramentum scilicet baptismi, ad exstinguendum venenum serpentis, scilicet fomitem, et originale peccatum. Eccli. iii, 33: Ignem ardentem exstinguit aqua. Illum ignem de quo Isa. IX, 18 : Succensa est quasi ignis impietas.

Vel sic : " Quemadmodum cervus, " etiam renovatur secundum illud Apostoli ad Ephes. IV, 22-24: Deponite vos veterem hominem,...et induite novum, etc. Et ibidem, Renovamini spiritu mentis vestrae. Hinc inolevit consuetudo, quod in vigilia Paschae, quando solebant antiquitus baptizari, cantabatur iste Psalmus.

Vel de viro perfecto sic : " Quemadmodum desiderat cervus ad fontem aquarum, " extracto serpente venenoso de caverna, sicut dictum est : " ita anima mea, " interfecto per paenitentiam diabolo, ut jam non regnet per peccatum in nostro mortali corpore. Ad Roman. VI, 12 : Non regnet peccatum in vestro mortali corpore. Et interficietis, quantum in vobis est, serpentem antiquum diabolum, de quo Genes, III, 1 : Sedet serpens erat callidior cunctis animantibus, etc.

Isa. XXVII, 1 : In die illa visitabit Dominus .......super Leviathan, serpentem vectem, etc. " Desiderat ad te, o Deus, " ut sitim et ardorem desiderii mei, qui es fons vivus, exstinguas. Psal. xxxv, 10 : Quoniam apud te est fons vitae. Ecce quod dicebat Paulus jam expulso serpente, scilicet diabolo, ad Philip. I, 23: Desiderium habens dissolvi, et esse cum Christo. Sed cum bonitas Creatoris in infinitum excedat bonitatem creaturae, quomodo comparavit David desiderium Dei a viro justo, desiderio fontis a cervo animali bruto ? Respons. Homo per pec-? caium factus est brutalis, Psal. xlviii, 13 : Homo, cum in honore esset, non intellexit, comparatus est jumentis insipientibus, etc. Et alibi, Psal. lxxii, 23 : Ut jumentum factus sum apud te. Et ideo magnum est quantum est ex parte sui si desideret sicut brutum. Vel potest dici, quod desiderium humanum ex ratione multo excellit desiderium bruti, tamen in tribus debet assimilari desiderio cervi in hoc casu. Primo, ut desideret Deum totaliter, sicut cervus totaliter fontem, non aliquam ejus partem vel rivum. In Psal. XXXVII, 10, supra : Domine, ante te omne desiderium meum. Item, secundo, ut desideret indesinenter, sicut cervus fontem vivum. Isa. XXVI, 9 : Anima mea desideravit te in nocte : sed et spiritu meo in praecordiis de mane vigilabo ad te. Item, ut perseveranter, scilicet usque in finem, quando ab eo remuneremur, sicut cervus hoc desiderium continuat. Psal. CIV, 4 : Quaerite Dominum, et confirmamini, quaerite, etc. Matth. x, 22 : Qui perseveraverit usque in finem, hic salvus erit.

" Sitivit anima mea. " Hic secundum. Quasi diceret: " Desiderat anima mea, " non modo primo, imo " sitivit, " jam diu est " ad Deum. " Graeca versio habet, " fortem, " quasi diceret, non ad idola fictilia, et fragilia. Sapient. XIV, 8 : Illud autem cum esset fragile, deuscognominatus est. " Vivum, " non mortuum, sicut illa Baruch, VI, 41 : Sensum non habent ipsi dii illorum. Sapient. XIII, 17 : Non erubescit loqui cum illo qui sine anima est. Vel " fontem vivum : " sic enim appellat se. Jerem. ii, 13 : Me dereliquerunt fontem aquae vivae.

" Quando veniam. " Ecce vehementia desiderii. Quasi dicat : Tarde. Et dicit Glossa Augustini : " Citius est Deo, tar-" dius est desiderio. " Proverb xiii, 12 : Spes, quae differtur, affligit animam. Cassiodorus : " Quando cum pondere " pronuntiandum, ut gravis ei videatur " esse dilatio. " Et " apparebo ante faciem Dei, " ut satiet illo aeterno fonte, et reficiam sitim meam. Psal. XVI, 15 : Satiabor cum apparuerit gloria tua. Hic nota, quod sitis accrescit ex tribus. Ex purgatione, ex sale, ex calore. Sic certe spiritus purgati ab omni humore peccati sitiunt Deum. 1 Pet. i, 12 : In quem desiderant Angeli prospicere. Et repleti sale divinae sapientiae anxii sunt ad Deum venire, secundum illud Eccle. I, 18 : Qui addit scientiam, addit et laborem sitis quam habet a Deo. Et ardentes et tabescentes divino igne. Eccli. XXIII, 22 : Anima calida quasi ignit ardens, non exstinguetur donec aliquid glultiat.

Nota etiam, quod Deus dicitur fons, quia seipsum nobis indesinenter communicat. Eccli. XXIV, 14 : Usque ad futurum saeculum non desinam. Item, communicans se indesinenter, semper abundat. Isa. I, 11 : Plenus sum. Quippe flumina quae ab eo procedunt, Filius et Spiritus sanctus, ab eo non recedunt. Joan. I, 18 : Unigenitus Filius, qui est in sinu Patris, ipse enarravit. Joan. XIV, 11 : Ego in Patre et Pater in me est. Item, aqua plus delectat omni alio : sic Deus super omnia delectabilia. Psal. xv, 11 : Delectationes in dextera tua usque in finem. Proverb, IX, 17 : Aquae furtivae dulciores sunt. Psal. xxx, 20 : Quam magna multitudo dulcedinis lux, etc.

" Fuerunt mihi lacrymae. " Hic secundum, in quo subjungitur pro dilatione lacrymatio : et dicuntur duo. Primo, lacrymatio. Secundo, lacrymalionis ratio, ibi, " Dum dicitur mihi. "