QUAESTIO XXIII.

Per quid dejectus fuerit ?

Deinde quaeritur, Per quid dejectus fuerit ?

Et hoc maxime propter haereticos Manichaeos, qui dicunt in dejectione Luciferi praelium magnum fuisse in caelo: inducentes illud Apocalypsis, xii, 7 et 8: Et factum est praelium magnum in caelo: Michael et Angeli ejus praeliabantur cum dracone, et draco pugnabat et Angeli ejus: et non valuerunt, neque locus inventus est eorum amplius in caelo. Dicunt ergo si proelium fuit, et praelium requirit moram et resistentem virtutem, videtur quod Angeli cadentes postquam aversi sunt a Deo per superbiam, aliquam moram traxerunt in caelo, et quod aliquam virtutem habebant resistendi judicio Dei condemnantis eos.

Quod si concedatur, erit contra hoc:

1. Quod dicit Petrus in secunda canonica sua sic, ii, 11: Angeli fortitudine et virtute cum sint majores, non portant adversum se exsecrabile judicium.

2. Adhuc, Cum superiorum Angelorum magis sit consentire Deo, quam inferiorum, qualiter attribuitur magis praelium hoc Michaeli, quam Cherubim, et Seraphim?

Solutio, Praelium illud quod haeretici dicunt factum fuisse in caelo, Glossa exponit factum esse in Ecclesia, et non in caelo, nisi secundum quod exponitur, in caelo, hoc est, pro caelo, sive pro caelestibus, sicut exponitur, ad Ephes, vi, 12: Non est nobis colluctatio adversus carnem et sanguinem (supple, tantum), sed adversus principatus et potestates, adversus mundi rectores tenebrarum harum, contra spiritualia nequitiae, in caelestibus. Glossa, hoc est, " pro caelestibus: " et secundum hoc Michael et Angeli ejus nominantur. Quia, sicut dicit Hieronymus, Michael praepositus est Ecclesiae et princeps. Angeli autem ejus sunt Angeli deputati ad custodiam animarum: quorum officium proprium est semper decertare contra diabolum, ne seducat animas sibi commissas. Et hoc patet per hoc quod sequitur, ubi animae defensae cum Angelis sibi deputatis grates Deo referunt, sic dicendo: Nunc facta est salus, et virtus, ei regnum Dei nostri, et potestas Christi ejus, quia projectus est accusator fratrum nostrorum, qui accusabat illos ante conspectum Dei nostri die ac nocte: et ipsi vicerunt eum propter sanguinem Agni, ei propter verbum testimonii sui: ei non dilexerunt animas suas usque ad mortem . Constat autem, quod sanguis Agni multo tempore fusus est post casum Angelorum a principio: et ideo pugna illa ad primum casum Angelorum referri non potest, sed ad Ecclesiam, ut dictum est.

Si autem Instantiae haereticorum condescendatur, ut anagogice exponatur de praelio quod factum est in caelo: tunc praelium nihil aliud est, quam conatus, quo contra justitiam Angeli mali conati sunt obtinere Dei similitudinem in hoc quod essent propriae potestatis: et talis conatus nec moram requirit, nec magnae virtutis resistentiam, quia in se debilissimus est. Et hoc Michaeli attribuitur ratione interpretationis nominis: Michael enim quis ut Deus interpretatur: quod congrue cum increpatione et pugna dicitur ei, qui similitudinem Dei obtinere nititur conatu impio et contra justitiam.

Juxta hoc ulterius quaeritur de rudentibus, de quibus dicit Petrus in secunda canonica, ii, 4: Deus Angelis peccantibus non pepercit, sed rudentibus inferni detractos in tartarum tradidit cruciandos, in judicium reservari.

Super quod dicit Petrus Gallus haere- ticus, quod per hoc patet pugnam in caelo fuisse, et Angelos cadentes primo corpora aetherea habuisse, in quibus ligati funibus de caelo praecipitati sunt.

Sed contra hoc est, quod secundum hoc Petrus debuisset hic dixisse, Funibus, non rudentibus: eo enim ipso quod dixit, Rudentibus, significabat se metaphorice loqui. Unde Glossa ibidem sic dicit: " Rudentes sunt funes, quibus nautae velum suspendunt, ut flante aura portus tranquillitatem relinquant, seque super ambiguis fluctibus credant. Quibus rudentibus convenienter immundorum spirituum conamina comparantur, qui mox ut flante superbia impulsi, se adversus Creatorem erexerunt, ipsis elationis suae conatibus portum felicitatis aeternae reliquerunt, et in profundum abyssi rapti sunt et dimersi. " Unde patet, quod nec corpora habuerunt, nec funibus ligati praecipitati sunt, ut fingit haereticus.