MEMBRUM III.

In quid ceciderit Angelus malus quoad

locum ?

Deinde quaeritur, In quid malus Angelus cecidit quoad locum ?

Et dicit Magister in libro II Sententiarum, distinct. VI, cap. Solet quaeri, quod " in istum caliginosum aerem ceciderunt: " quotidie tamen descendunt in infernum, qui animas impiorum illuc deferunt, et ibi cruciant. De Lucifero etiam dicit, quod quidam opinantur, quod in inferno religatus sit, et ad nos tentandos modo ante tempora Antichristi accessum non habeat.

Contra hoc tamen objicitur.

1. II Petr, ii, 4, dicitur, quod rudentibus inferni detracti sunt, qui trahunt in infernum, non in istum aerem.

2. Adhuc, Locus paenarum aeternarum infernus est: daemones autem condemnati sunt ad paenas aeternas: ergo videtur, quod ceciderunt in infernum.

3. Adhuc, Summae superbiae per rationem condemnantis justitiae debetur infimus locus: infimus locus infernus est: ergo summa superbia eorum projecta est in infernum.

Contra:

1. II Sententiarum, distinct. VI, cap. Solet autem quaeri, dicitur, quod " in istum caliginosum aerem projecti sunt. ".

2. Adhuc, Apocal, xii, 9: Projectus est draco ille magnus, serpens antiquus, qui vocatur diabolus et Satanas,... et projectus est in terram, et Angeli ejus cum illo missi sunt. Et, ibidem, v. 12: Vae terrae ei mari, quia descendit diabolus ad vos, habens iram magnam.

3. Adhuc, Videtur quod alium locum sui casus habuerunt ante passionem Domini, et alium post, et alium in die judicii. Apocal, xx, 1 et seq.: Et vidi Angelum descendentem de caelo, habentem clavem abyssi, et catenam magnam in manu sua. Et apprehendit draconem, serpentem antiquum, qui est diabolus et Satanas, et ligavit eum per annos mille: et misit eum in abyssum, et clausit, ei signavit super illum. Et infra, v. 7: Et cum consummati fuerint mille anni, solvetur Satanas de carcere suo, et exibit, et seducet gentes quae sunt super quatuor angulos terrae, Gog et Magog. Ergo videtur, quod ante tempus Incarnationis fuit in mundo cum hominibus, et per totum tempus gratiae (quod per mille annos significatur) religatus sit in abysso, et tempore Antichristi iterum futurus in mundo cum hominibus.

Solutio. Dicendum, quod duplex est locus in quem cecidit daemon. Unus secundum debitum culpae superbiae suae. Alter secundum ordinem providentiae divinae, quae etiam malum quod fit, ut dicit Augustinus, fieri non permitteret, nisi sciret quae bona ex malo facto eliceret. Et de talibus dicit Gregorius, quod " Deo militat etiam id quod per malitiam voluntatis contrariatur et obstat. " Primus locus casus, est profundum inferni: talis enim locus quia infimus est, tantae superbiae debetur. Isa. xiv, 15: Verumtamen ad infernum detraheris, in profundum laci. Secundus locus est iste caliginosus aer, in quo usque ad diem judicii in exercitio tentationis hominum continentur. Hoc enim bonum, quod est exercitium virtutis Sanctorum, elicuit providentia divina de tanto malo.

Primo igitur modo procedunt primae rationes: quia procul dubio tantae superbiae demerito debebatur infimus locus: ut scilicet de summo loco luminis, hoc est, de caelo empyreo in carcerem imarum tenebrarum detrudentur, perpetuis ignibus affligendus. Verumtamen est, quod quantum ad exercitium tentationis diversas habet potestates. Ante tempora enim Antichristi dicitur habere religatam potestatem: eo quod in deserto tentavit Christum, et victus est . Et in passione tentavit impedire passionem Christi, et iterum victus est: ubi apparuit uxori Pilati, et voluit impedire passionem Christi : unde tunc superatus minorem habuit potestatem. Tempore vero Antichristi, sicut dicitur, II ad Thessal, ii, 10 et 11: Eo quod charitatem veritatis non receperunt ut salvi fierent, ideo mittet illis Deus operationem erroris, ut credant mendacio, ut judicentur omnes qui non crediderunt veritati: dicitur solvendus esse ad ministerium Antichristi, relaxata sibi potestate.

Et quantum ad hunc ordinem providentiae procedunt rationes in contrarium adductae.

Et per hoc patet solutio ad totum.

DE PRAELATIONE ANGELORUM TAM BONORUM

QUAM MALORUM.

Deinde ratione ejus quod dicitur in libro II Sententiarum, distinct. VI, cap. Et sicut inter bonos Angelos alii aliis praesunt, quaeritur de praelatione Angelorum tam bonorum quam malorum.

Et quaeruntur hic duo, scilicet qualiter Angelus praeest Angelo tam bonus quam, malus ?

Et qualiter Angelus tam bonus quam malus praeest animae rationali ? Haec enim et revelationem accipit ab Angelo bono, et illusionem ab Angelo malo.