Albert the Great, Commentarii In Psalmos

" Magnus Dominus. " Hic est Psalmus quadragesimus septimus, in quo postquam monuit ad laudandum Deum, et sponsum, de quo egit supra, quia laudare non convenit in terra aliena, et Babylonia infidelium Synagoga, secundum illud Psal. CXXXVI, 4 : Quomodo cantabimus canticum Domini in terra aliena ? subjungit de civitate Dei et sponsi, in qua solum potest hoc Canticum, haec laus quae ad ipsum pertinet, fructuose cantari, et non ab aliis, nisi a civibus hujus civitatis.

Et hoc ostenditur in titulo qui talis est: " Psalmus Cantici " secundum Hieronymum, vel, Laus Cantici, secundum Augustinum : " Core filiis, secunda sabbati. " Et est sensus : " Psalmus " iste, qui est " Cantici, " quia monet ad laudem et Canticum Dei. Infra, v. 12 : Laetetur mons Sion, etc. Et " filiorum Core, " id est, filiorum Christi crucifixi, vel convenit" filiis Core, " ut ipsum cantent, non alii. Eccli. xv, 9 : Non est speciosa laus in ore peccatoris, filii diaboli. " Psalmus " dico habitus, vel Laus Cantici habita, " secunda, " id est, pro secunda " Sabbati. "

Notandum enim, quod prima Sabbati est dies Domini, id est, prima dies post Sabbatum, in qua Christus resurrexit corpus resumens lucidissimum, quod figuratum fuerat Genes.I, 3, in principio, ubi legitur, quod eodem die, scilicet Dominica, facta est lux. Sicut ergo prima Sabbati est dies resurrectionis, sic in secunda Sabbati dies confirmationis totius Ecclesiae, quando Apostoli sunt confirmati, et Ecclesia super illos fundata, quod et significatum fuit Genes.I, 6, ubi legitur, quod secunda die factum est firmamentum, in quo significatur Ecclesiae confirmatio, quam constat post resurrectionem factam, in tantum ut

Petrus, qui ad vocem ancillae negaverat , postmodum de contumeliis et verberibus illatis a concilio gauderet. Act. v, 41 : Ibant Apostoli gaudentes a conspectu concilii. Et tunc in hujus constantia et aliorum Apostolorum fundata est Ecclesia, et sic postea dilatata per totum mundum. Hoc est quod dicitur in Psal. XCII, 1 : Dominus regnavit resurgendo, decorem indutus est, claritatem scilicet, indutus est Dominus fortitudinem, agilitatem et subtilitatem, quibus nihil possit resistere, et praecinxit se virtute impassibilitatis. Et post: Firmavit orbem terrae, qui non commovebitur, scilicet Ecclesiam. Ergo idem est dicere, Psalmum vel laudem esse pro secunda Sabbati, ac si diceret, pro confirmatione et dilatatione Ecclesiae facta secunda Sabbati.

Dividitur autem Psalmus in duas partes. Primo ponitur Ecclesiae commendatio a fundatione et firmitate, et quibusdam aliis civitatibus congruentibus. Secundo, agitur de modo et ordine fundationis ejus, ibi, " Suscepimus, Deus. "

In prima sex, secundum sex a quibus commendat istam civitatem. Primo, a dignitate conditoris et fundatoris hujus civitatis. Secundo, a situ, ibi, "In monti tem. " Tertio, ab amplitudine, ibi, "Fundatur exsultatione. " Quarto, a benignitate regentis, ibi, " Cum suscipiet eam. " Quinto, a nativitate civium hujus civitatis, ibi, " Sicut audivimus. " Sexto, ab aeterna ejusdem fundatione, ibi, " Deus fundavit eam in aeternum. "