MEMBRUM III.

Utrum omnes Angeli vel quidam de bonis mittantur ?

Tertio quaeritur, Utrum omnes Angeli, vel quidam de bonis mittantur ?

Et videtur, quod non omnes.

1. Ezechiel. i, 26, super illud: Quasi adspectus lapidis sapphiri similitudo throni. Gregorius: " Adspectus lapidis sapphiri, aerei coloris est. Huic virtutes caelestes comparantur: quia spiritus quibus Deus omnipotens altius praesidet, superioris loci in caelestibus dignitatem tenent. Similiter Throni virtutes caelestes sunt, qui ipsos Angelos loci dignitate transcendunt. " Cum enim Angeli nuntii dicuntur, et saepe Angeli ad nuntianda quaedam hominibus veniant, Throni missi ad ministerium nuntii numquam leguntur.

2. Adhuc, Soli illi spiritus qui Angeli vocantur et nuntii interpretantur, nuntiorum nomen habent: nuntius autem est, qui mittitur ad exteriora: ergo soli illi mittuntur ad exteriora, et non alii.

3. Adhuc, Gregorius: " Superiora illa agmina quae circa Deum sunt, usum exterioris officii non habent . " Videtur ergo, quod Cherubin, Seraphin, et Throni ad exteriora officia numquam mittantur.

4. Adhuc, Daniel, vii, 10: Millia millium ministrabant ei, et decies millies centena millia assistebant ei. Ergo quidam ministrant, et quidam assistunt: sed non mittuntur nisi qui ministrant, quia non mittuntur nisi ad ministerium: videtur ergo, quod assistentes non mittuntur: ergo non omnes mittuntur.

Solutio. Ad hanc quaestionem respondet Magister in libro II Sententiarum, distinct. X, cap. 1, sic: " Quidam putant in

illa multitudine caelestium spirituum aliquos esse, qui foras pro officio suo exeunt: alios qui intus semper assistunt, sicut scriptum est in Daniele, vii, 10: Millia millium, etc. " Et confirmat hoc per Dionysium in Caelesti hierarchia, qui de praelatione spirituum ait: " Superiora illa agmina ab intimis numquam recedunt: quoniam ea quae praeeminent, usum exterioris officii numquam habent. " Et statim objicit in contrarium per illud Isaiae, vi, 6: Volavit ad me unus de Seraphim: qui ordo superior est et excellentior. Ideoque si de illo ordine mittuntur, non est ambigendum, quin etiam et de aliis mittantur. Objicit etiam per hoc quod dicitur, ad Hebr, i, 14: Nonne omnes sunt administratorii spiritus, in ministerium missi propter eos qui haereditatem capient salutis.

Et solvit tandem dicens, quod " quidam dicunt omnes quidem mitti, sed alios saepius et quasi ex officio injuncto, qui Angeli vel Archangeli nominantur: alios vero rarius mitti, scilicet majores, causa extra communem dispensationem oborta: qui cum ministerium Angelorum suscipiunt, etiam nomen assumunt. Unde in Psalmo ciii, 4: Qui facis Angelos tuos spiritus : quia illi qui natura spiritus sunt, aliquando Angeli, id est, nuntii fiunt. "

Innuit etiam solutionem aliam dicentium, quod omnes mittuntur, scilicet superiores ad medios, medii ad inferiores, et inferiores ad nos. Et hoc confirmant per dictum Gregorii, qui super illud Isaiae, vi, 6: Volavit ad me unus de Seraphim, sic dicit: " Utrum per se hoc faciant superiores Angeli, an per subjecta agmina agatur, nos affirmare nolumus quod certis testimoniis non approbamus. " Dionysius tamen expresse asserit hoc in Caelesti hierarchia , sicut patet in antehabitis.

Adhuc quidam dicunt omnes mitti, confirmantes per hoc, quod quaedam in Scriptura leguntur esse facta per Cherubin, quaedam per Seraphin, et similiter per alios effectus a quibus nominantur Angeli: et ideo dicunt omnes de omnibus ordinibus mitti. Et dicunt, quod Michael et Gabriel de superiori ordine sunt: et ideo supremum de conceptu Virginis et incarnatione Filii Dei missi sunt nuntiare. Et videtur fuisse opinio Magistri in Sententiis, et Praepositivi, et Gulielmi Antisiodorensis.

Ad contra objecta respondent. Ad primum quod faciunt, quod in hoc est usus ministerii exterioris. Dicunt enim, quod est ministerium actus interioris, quod fit circa spiritum, sive animam sive Angelum, et hoc fit secundum actum hierarchicum., qui tres sunt, ut dicit Dionysius,, scilicet purgare, illuminare, et perficere sive reducere in Deum: et ad hos actus omnes mittuntur. Et est usus actus ministerii exterioris, quod triplex est, scilicet nuntiare exterius, punire malos, et juvare etiam corporaliter bonos. Et ad hos non dicunt mitti nisi inferiores: et dicunt, quod hoc est quod dicit Gregorius, quod superiora agmina usum exterioris officii non habent.

Ad aliud dicendum, quod soli Angeli dicuntur nuntii, non quia soli mittuntur, sed quia frequentius mittuntur ad exteriora: propter quod etiam (ut dicunt) omnes caelestes spiritus Angeli dicuntur.

Ad dictum Gregorii patet solutio per paulo ante dicta secundum eos qui hanc tenent opinionem.

Ad aliud dicendum, quod illa divisio non datur ut dividat inter Angelos, sed ut distinguat duas virtutes Angelorum, assistricem scilicet, et ministratricem: unde dicit Gregorius, quod quamvis quandoque ministrant, tamen ab intimis non recedunt.