MEMBRUM V.

Quibus mittantur Angeli ?

Quinto quaeritur, Quibus mittantur?

Et videtur, quod ad pusillos, qui seipsos sufficienter juvare non possunt, per illud Matthaei, xviii, 10, ubi Dominus monet cessandum esse a scandalo pusillorum et contemptu, dicens: Videte ne contemnatis unum ex his pusillis, scilicet qui in me credunt: dico enim vobis, quia Angeli eorum in caelis semper vident faciem Patris mei qui in caelis est.

Sed tunc quaeritur, Utrum quilibet Angelus circa pusillos tantum exerceat actum illius doni a quo denominatur, ut Seraphin actum incendii charitatis, Cherubin actum lucis scientiae et intelligentiae, Throni actum judicii et determinationis justitiae, et sic de aliis: vel unusquisque missus Angelus promptus et paratus est ad ministerium exercere actus omnium donorum aliorum omnium Angelorum ?

Et videtur, quod primo modo res se habeat: quia in humanis ubi unus intromittit se de officio alterius, confusio fit ministeriorum: confusio autem talis in dispositione regis caelestis esse non potest: quod significatur, III Reg. xx, 5, ubi dicitur, quod regina Saba videns ordinem ministrantium in curia Salomonis, non habebat ultra spiritum.

In contrarium tamen hujus est,

1. Quod dicitur a beato Gregorio, quia licet in Thronis Dominus sedeat, et sua judicia disponat, tamen etiam dicitur in Psalmo lxxxix, 2, quod sedet super Cherubin ut rex et judex. Et licet Angeli sint nuntiantes, et ab officio nuntiorum ordo eorum denominetur, tamen Gregorius dicit, quod etiam alii Angeli de aliis ordinibus multa nuntiant. Et sunt haec verba Gregorii: " In illa superna civisate sic specialia sunt quaedam singulorum, ut tamen communia sint omnium: et quod quisque habet in se ex parte, hoc totum in alio ordine possideat . "

2. Adhuc, Expresse dicit Dionysius in Caelesti hierarchia , quod purgans labia Prophetae per calculum ignitum , luit de ordine inferiori: et tamen exercuit actum officii superioris circa Prophetam: et si inferior hoc fecit, tunc quilibet alius potest hoc facere.

Solutio. Dicendum, quod in veritate (sicut et ante nos quidam antiqui dixerunt) secundum dictum Gregorii, quilibet Angelus promptus et paratus est ad exercendum officia omnium aliorum. Et quod ordo nominatur a dono uno, non ideo est, quod solus acceperit illud, sed ut dicit Gregorius, quia plenius accepit illud, et frequentius exercet actum ejus. Et ita determinat Magister in libro II Sententiarum, distinct. IX, cap. Haec nomina illis.

Ad id autem quod objicitur de confusione ministeriorum, dicendum quod non fit confusio: quia ex hoc quod unus Angelus officium alterius aliquando exercet, proprium non negligit, quin expediat illud tempore et loco opportunis. In humanis autem ubi unus se in officium alterius ingerit, fit confusio: quia infirmitas humana tanta est, quod plura simul et ordinate et opportunis tempore et loco agere non potest.

Quae in contrarium adducuntur, procedunt sicut inducta sunt.