MEMBRUM III.

De organis Angelorum loquentium et audientium .

Tertio, Quaeritur de organis loquentium et audientium.

Videtur, quod in Angelis debent esse linguae, et aures spirituales:

1. Aliter enim non posset assignari, qualiter verbum ab uno procederet in alterum: locutio enim non fit nisi verbum procedat a dicente ad audientem: et id quo verbum formatur, linguae habet actum et vicem: et id quo recipitur, actum habet auris: et ita videtur, quod spirituales aures et linguae sint in Angelis. Sicut et Apostolus nominat linguam dicens, I ad Corinth. xiii, 1: Si linguis hominum loquar, et Angelorum.

2. Adhuc, Luc. xvi, 24, dives exotus corpore, dixit se cruciari in lingua: et si anima exuta corpore linguam habet, videtur quod et Angelus habeat: in hoc enim similes sunt, quod sunt substantiae spirituales rationales, non ex materia corporea existentes.

Contra: Lingua instrumentum corporum est, et auris similiter: nihil corporeae naturae est in Angelo: ergo nihil talium est in eo.

Solutio. Dicendum, quod nihil talium est in Angelo, nisi ad anagogicam significationem referatur, ut dicit Dionysius in libro de Caelesti hierarchia, ubi dicit sic: " Olfactivum vero significat discretivas virtutes: illud super intellectum suave olentis distributionis, quantum possibile, receptivum: et eorum quae sic non sunt, per scientiam discretivum et omnino refugitivum. Aurium vero virtutes illud particeps et gnosticum divinae inspirationis susceptivum . " Unde lingua in Angelis nec materialis est, nec virtus organo determinata: sed potestas intellectualis interpretandi suos conceptus ad alterum, lingua vocatur ab Apostolo secundum anagogicam significationem.

Ad primum objectum dicendum, quod verbum a dicente Angelo non procedit in audientem, per aliquem spiritum medium, qui sit verbi vehiculum, sicut est in locutione hominis: sed ab uno formatur in altero, quando per intentionem communicandi sibi suos conceptus dirigunt ad invicem: sicut quod est in uno speculo, formatur in altero directe sibi opposito, per processum luminis de uno in alterum per reflexionem. Et hae dicuntur interpretativae potestates et auditivae in Angelis secundum anagogicas significationes: et hoc vocat Apostolus linguam, ut dictam est.

Ad aliud dicendum, quod non est simile de Angelo, et anima exuta de corpore: quia anima per hoc quod secundum naturam est actus corporis, potentias habet organicas quas retinet etiam exuta a corpore. Angelus autem nullius corporis est actus, et nullam habet potentiam organicam: et si assumpto corpore dicatur habere organum corporis, erit referendum ad anagogicam significationem, ut dictum est, secundum quod spiritualia saepe figuris corporalium describuntur, sicut in praehabitis in quaestione de figuris corporum dictum est.

Quod in contrarium objicitur, concedendum est, quia procedit.