MEMBRUM II. De effectu custodiae Angelorum .

Secundo, Quaeritur de effectu custodiae.

Ponuntur autem, a Magistris antiquis duodecim effectus, quorum primus est, quod excitat a somno ignorantiae, et illuminat, et solvit a vinculis peccatorum. Et hoc significatur, Act. xii, 7, ubi sic dicitur: Angelus Domini adstitit, et lumen refulsit in habitaculo, scilicet carceris: percussoque latere Petri, excitavit eum, dicens: Surge velociter. Et ceciderunt catenae de manibus ejus.

Secundus est, quod confortat ad labores paenitentiae, et confortanda administrat. Et hoc significatur, III Reg. xix, 7 et 8, ubi Angelus dixit ad Eliam cum fugeret Jezabel: Surge, comede, grandis enim tibi restat via. Et ministravit ei panem subcineritium et vas aquae. Qui cum surrexisset, comedit et bibit, et ambulavit in fortitudine cibi illius, quadraginta diebus et quadraginta noctibus, usque ad montem Dei Horeb.

Tertius est, quod daemones arcet, ne instigent ad malum. Hoc significatur, Tob. xii, 3, ubi sic dixit Tobias de Angelo Raphaele: Daemonium ab ea, scilicet uxore mea, ipse compescuit.

Quartus est, quod docet de occultis. Daniel, ix, 22 et 23, dixit Angelus Danieli: Nunc egressus sum, ut docerem te, et intelligeres. Ab exordio precum tuarum egressus est sermo: ego autem veni ut indicarem tibi.

Quintus est, quod consolatur tristes. Tobiae, v, 11 et seq., dixit Angelus Tobiae: Gaudium tibi sit semper, Cui cum diceret Tobias: Quale gaudium mihi erit, qui in tenebris sedeo, ei lumen caeli non video ? Respondit Angelus: Forti animo esto: in proximo est, ut a Deo cureris.

Sextus est, quod revelat mysteria per apparitiones et visiones. Et hoc significatur, Genes, xviii, i et seq., ubi tres Angeli apparuerunt Abrahae, et instruxerunt eum de sacramento incarnatio- nis, et unus eorum dixit: Num celare potero Abraham quae gesturus sum. cum futurus sit in gentem magnam ac robustissimam, et benedicendae sint in illo omnes nationes terrae ?

Septimus est adjuvare contra hostes et insidiantes, Isa. xxxvii, 36: Egressus est Angelus Domini, et percussit in castris Assyriorum centum octoginta quinque millia. Et, IV Reg. vi, 8 et seq., ubi circa Eliseum apparuerunt equi ignei et currus, defendentes eum ab insidiis Syrorum.

Octavus est, quod increpat pro delictis. Judicum, ii, 1 et 2: Ascendit Angelus Domini de Galgalis ad locum flentium, et ait: Eduxi vos de aegypto, et introduxi in terram, pro qua juravi patribus vestris, et pollicitus sum, ut non facerem irritum pactum meum vobiscum in sempiternum, ita dumtaxat ut non feriretis foedus cum habitatoribus terrae hujus, sed aras eorum subverteretis: et noluistis audire vocem meam. Cur hoc fecistis ?

Nonus est, quod aufert impedimentum ad bonum, et praeparat viam. Malach, iii, 1: Ecce ego mitto Angelum meum, et praeparabit viam ante faciem meam.

Decimus est, quod ducit et conducit in via, Tob. v, 20: Ego sanum ducam, et sanum tibi reducam filium tuum. Et, ibidem, v. 27: Credo quod Angelus Dei bonus comitetur ei, et bene disponat omnia quae circa eum geruntur.

Undecimus est, quod mitigat tentationes, et confortat ad virtutem. Genes, xxxii, 24 et 25: Ecce vir luctabatur cum eo, scilicet Jacob, usque mane. Qui cum videret quod eum superare non posset, tetigit nervum femoris ejus, et statim emarcuit. Ubi dicit Gregorius, quod lucta signat impressionem virtutis ad bonum, tactus femoris debilitatem tentationis carnalis.

Duodecimus est, quod Deo offert orationes. Tob. xii, 12: Quando orabas cum lacrymis, et sepeliebas mortuos, etderelinquebas prandium tuum, et mortuos abscondebas per diem in domo tua, et nocte sepeliebas eos, ego obtuli orationem tuam Domino.

Isti duodecim effectus describuntur in Scripturis esse ex custodia Angelorum circa hominem. Sunt tamen alia innumerabilia bona, quae proveniunt homini ex custodia Angelorum.

Et si isti duodecim accipi debeant per artem, sic possunt accipi, secundum quod duo exiguntur ad perfectam custodiam, scilicet exclusio mali, et conductio ad bonum.

Et penes exclusionem mali sumuntur septem de istis effectibus. Est enim malum triplex quod excludi debet, scilicet malum culpae, malum paenae, et malum dispositionis sive ad malum culpae, sive ad malum paenae. Malum culpae aut consideratur in se, aut in causa instigante ad ipsum. Si in se consideratum excluditur: tunc est primus effectus, qui est absolvere a vinculis peccatorum. Si consideratur in causa, dupliciter consideratur, scilicet penes instigantem, et penes modum instigationis. Si penes instigantem, est modus tertius, qui est arcere daemones. Si est penes modum instigationis, est undecimus qui est mitigare tentationes.

Penes exclusionem paenae duplex est consideratio: paena enim consideratur in se, et consideratur secundum nocumentum quod infert. Si consideratur in se, est effectus septimus, qui est adjutorium contra hostes. Si excluditur secundum nocumentum quod infert, est effectus quintus, qui est consolari afflictum.

Si est exclusio mali quod disponit ad malum culpae vel paenae, accipitur duobus modis: aut enim disponit directe ad malum, aut indirecte. Si directe, et sic excluditur, est effectus octavus, qui est increpatio pro delictis quae disponunt ad malum, Si autem indirecte, et sic excluditur, tunc est effectus nonus, qui est auferre impedimenta ad bonum.

Si autem, custodia accipitur in conductione ad bonum, hoc est duobus modis: illud enim bonum aut est ex parte intellectus, aut est ex parte affectus de pertinentibus ad salutem. Si primo modo, tunc est effectus quartus, qui est docere de occultis, secundum quod docere accipitur de omnibus pertinentibus ad salutem.. Si est bonum intellectus de pertinentibus ad revelationem et ad contemplationem, est effectus sextus, qui est revelare mysteria par apparitiones.

Si autem est bonum affectus, tripliciter consideratur. Si autem consideratur secundum statum affectus qui. non est in proprio robore, sed indiget confortantibus, est effectus secundus, qui est confortatio ab bonum ut peragatur via praesentiae. Aut est secundum fervorem affectus, qui duce indiget, ne fervore deviet, et tunc est effectus decimus, qui est ducere et conducere in via. Si autem est ad bonum affectus impetrandum, tunc est effectus duodecimus, qui est orare et orationes deferre,