ET QUAESITUM PRIMUM.

Qui sit Seraphin ?

Ad primum accipiantur verba Dionysii qui in Caelesti hierarchia sic dicit:

" Sanctam Seraphin nominationem quae

Hebraeorum sunt, scientes, aut incendentes manifestare aut calefacientes . "

Sed contra hoc objicitur sic:

1, Prima conversio in Deum per ignem amoris, est secundum accipere, et non secundum agere. Si ergo donum a quo denominantur, accipiunt, et non dant Deo a quo accipiunt, videtur quod potius debent dici incensi et calefacti, quam incendentes et calefacientes.

2. Adhuc, Duae sunt proprietates ignis, illuminatio scilicet, et ustiva. Ustivam habet in quantum est elementum: illuminativam, ut dicit Aristoteles in II de Anima, habet ex convenientia cum perpetuo superius corpore, hoc est, cum caelo. Ergo illuminatio dignior est, quam ustiva proprietas: et a digniori debet esse denominatio: ergo videtur, quod, potius deberent dici illuminantes, quam incendentes.

3. Adhuc, Basilius super illud Psalmi xxviii, 7: Vox Domini intercidentis flammam ignis: dicit, quod " in die judicii vox. Domini intercidet flammam ignis, ita quod illuminativum ascendat sursum ad beatos in caelum, et ustivum ad infernum ad locum damnatorum. " Ex quo accipitur, quod illuminativum competit beatitudini, et ustivum damnationi. Ergo ab illuminatione deberent potius denominari beatissimi., Angeli, quam ab ustione.

4. Adhuc, Cum proprietas ignis sit siccitas sequens caliditatem, quaeratur utrum aliquid in Angelis sit responderis siccitati? Et videtur quod sic, secundum illud quod, Deuter, iv, 24, dicitur: Dominus Deus tuus ignis consumens est. Proximi ergo Angeli Dei ab igne consumente denominantur: non autem, consumit ignis nisi humidum, ut dicit Aristoteles, et consumendo humidum inducit siccum: ergo videtur, quod aliquid respondens siccitati conveniat Seraphin,,

5. Adhuc, Aristoteles in VI Topico-rum dicit, quod ignis est subtilissimum corporum sphaerae: et ideo in terminis est altitudinis orbis. Et Avicenna dicit, quod undique tangit cameram caeli lunae por totum orbis circumitum. Quaeratur ergo, Quid sit respondens in istis Angelis illi proprietati ignis?

Solutio. Gregorius dicit, et in libro II Sententiarum ponitur, distinct. IX, cap. Haec nomina illis non propter se, quod quisque ordo illius rei censetur nomine, quam plenius accepit in numere. Et sic Seraphin a proprietate ignis sunt Seraphin nominata: quia, sicut dicit Bernardus in sermone 19 Super Cantica, " Angelos qui Seraphin dicuntur, ipsa charitas Deus in se adeo traxit et absorbuit, atque in eumdem rapuit sanctae affectionis ardorem, ut unus cum Deo esse spiritus videatur: instar profecto ignis, qui aerem quem inflammat, dum suum ei fotum calorem imprimit, inducitque colorem, non ignitum, sed ignem fecisse cernitur. Amarit itaque praecipue contemplari in Deo charitatem quae numquam excidit. " Propter quod, charitas supremum est in donis, a quo supremi Angeli denominantur.

Ad primum ergo dicendum, quod incensum et calefactum non dicunt nisi plenitudinem sufficientiae charitatis acceptae, et non dicunt plenitudinem copiae, qua quis potest refundere in alium quod accepit: cum perfectio hierarchiae sit in effusione illuminationum in alium: et hanc plenitudinem copiae non habet ignitum, sed ignis. Unde ut notetur, quod ex abundantia charitatis possunt aliis influere abundanter, potius dicuntur calefacientes et incendentes, quam calefacti et incensi.

A. D aliud dicendum, quod istae proprietates, luminosum scilicet, et calidum, dupliciter considerantur, scilicet in se, et secundum comparationem ad vitam quam faciunt: utrumque enim est unum

vivificum principium in naturis. In se considerata, luminosum dignius est ustivo et calefactivo, sicut probatum est auctoritate Aristotelis et Basilii: sed in ordine ad vitam quam faciunt, calidum proximius est vitae, quam luminosum: quod patet per hoc, quod luminosum non facit vitam nisi per calidum, tam in naturalibus, quam in spiritualibus. In naturalibus enim cor, vel id quod loco cordis est, per calorem vivificum vivificat totum corpus. In spiritualibus autem vita gratiae et vita gloriae secundum complementum est in calore affectionis secundum charitatem, et in lumine intelligentiae non est nisi secundum dispositionem.

Ad aliud dicendum, quod calidum quod descendit ad infernum, est calidum fumosum terreum: hoc enim ustivum est, et consumptivum, et exsiccativum. Calidum autem caeleste, ut dicit Aristoteles in libro XVI de Animalibus, vivificativum et formativum est. Et secundum hoc illud nobilius est luminosum: et secundum hanc proprietatem ab ipso calido denominantur Seraphin.

Ad aliud dicendum, quod siccitas qualitas est mortificativa, et nihil commune habet cum vita: et ideo nihil est in Angelis respondens siccitati, Sed potius sicut calidum caeli secundum Aristotelem operatur in humido vivifico, quod est principium vitae, subtiliando ipsum et vivificando et formando: ita calidum divinum operatur in humido pietatis et devotionis ad actum vitae gratiae et gloriae: quem actum suscipere non potest destitutus humido pietatis et devotionis. Et quod dicitur, Deuter, iv, 24: Dominus Deus tuus ignis consumens est, Glossa dicit, quod est consumens omnem malitiam, non humorem pietatis et devotionis.

Et quod Aristoteles dicit, quod consumit humorem, et inducit siccitatem.

dicendum quod non consumit humorem, nisi in se trahendo et sibi assimilando: unde per se attrahit, et per accidens consuluit, Et sic est in calore divino quod per se attrahit et absorbet, ut dicit Bernardus in auctoritate praeinducta: et in hoc calor ignis similis est calori divino. In hoc autem, quod per accidens sibi convenit consumere humorem, non habet similitudinem: sed potius sicut calor vivificus in homine propellit et dilatat humidum vivificum per omnia membra, ita calor divinus, postquam fortiter incaluerit, humorem pietatis et rorem devotionis et gratiae propellit et dilatat per omnia quae sunt Angeli.

Ad ultimum dicendum, quod subtilitati in Angelis respondet subtilitas essentiae, quae major est in Seraphin, quam in aliis: luminositati respondet perspicacitas intelligentiae: levitati quae in terminis est, nihil habens deprimentis naturae, respondet gradus ordinis, quo immediate locantur sub Deo, ut dicit Bernardus in praeinducta auctoritate.

ARTICULI PRIMI