ET QUAESITUM SECUNDUM, De proprietatibus Archangelorum ?

Secundo quaeritur, Quae sint proprietates Archangelorum ?

Quas tangit Dionysius in Caelesti hierarchia his verbis: " Ipsa autem Archangelorum sanctorum aequipotens quidem est caelestibus Principatibus. Est enim et eorum et Angelorum, ut dixi, hierarchia una et dispositio. Verumtamen quoniam quidem non est hierarchia nisi et primas et medias et ultimas virtutes habens, Archangelorum sanctus ordo communicativae hierarchiae medietati extremorum recipitur. Etenim sacratissimis Principatibus communicat et sanctis Angelis. Ipsis quidem, scilicet Principatibus: quia ad superessentiale principium principaliter convertitur, et ad ipsum ut possibile reformatur, et Angelos vivificat secundum bene ornatos ejus et ordinatos et invisibiles ducatus. Istis vero, scilicet Angelis, communicat: quia et eis prophetico est ordini divinas illuminationes hierarchice per primas virtutes suscipiens, et Angelis eas deiformiter nuntians, et per Angelos nobis manifestaris, secundum sacram uniuscujusque divinitus illuminatorum analogiam. "

1. Quaeritur ergo hic primo de hoc, quod dicit, Archangelos esse aequipotentes caelestibus Principatibus. Hoc enim non videtur esse verum, cum Principa- tuum sit superior ordo quam Archangelorum, et superior semper potentior sit in omni illuminatione, quam inferior.

2. Adhuc, Converti ad principium superessentiale, in praehabitis assignatum est pro proprietate Principum: et hoc assignatur pro proprietate Archangelorum: sed quorum est unum et idem proprium, ipsa sunt et unius et ejusdem speciei: videtur ergo, quod Principatus et Archangeli unus sint ordo in specie, quod falsum est.

3. Adhuc dicit, Quia prophetico ordini divinas illuminationes suscipit et communicat. Et quaeritur, Quis sit propheticus ordo ? cum prophetia sit gratia conveniens homini, et non Angelo.

Solutio. Dicendum, quod sicut dicit Dionysius, ordo Archangelorum medius est inter ordinem Principatuum et Angelorum, ut patet in auctoritate inducta. Et ideo dicit, quod communicativae medietati recipitur extremorum, hoc est, inter extrema, Principatus scilicet et Angelos. Et hoc ostendit nomen: Archangelus enim princeps nuntius dicitur, in nomine principum conveniens cum Principatibus, et in nomine nuntii conveniens cum Angelis. Et tres primas proprietates habet communes cum Principatibus, unam antem cum. Angelis, scilicet quartam.

Tres in quibus communicat cum Principibus, accipiuntur secundum duos actus hierarchiae proprios: quorum unus est, converti ad superius ad acceptionem illuminationis sive a Deo sive ab Angelo superiore. Secundus est, converti ad inferiores in eos transfundendo acceptam, illuminationem. Accepta autem illuminatio attenditur duobus modis, in se scilicet, et in effectu. Si. in se consideretur: tunc est proprietas prima, quae est haec, Ad super essentiale principium principaliter converti. Si consideretur in effectu.: tunc est secunda, quae est haec, Ad ipsum ut possibile reformari.

Reformatio autem illuminati ab illuminatore effectus est illuminationis.

Si vero accipitur secundum actum communicationis ad inferiores: tunc est tertia, quae est haec, Angelos vivificare secundum bene ornatos et ordinatos ejus et invisibiles ducatus. Et dicitur vivificare: quia per illuminationes in inferiores transfusas, inferiores facit appropinquare et conformari primo, quod vere simplex et unum est. Et dicuntur ducatus: quia in talibus superior dux est inferioris reducens eum in primum. Et dicuntur bene ornati: quia talis ducatus est secundum illuminationes habentes ornatum virtutis et honestatis. Et dicuntur bene ordinati ducatus: quia sic reducendo salvatur ordo legis divinae, quae est per prima media, et per media ultima reducere.

Quarta vero proprietas sumitur ex communicatione cum Angelis: et haec est, Quia eis prophetico ordini divinas illuminationes hierarchice per primas virtutes suscipiens, et Angelis eas deiformiter nuntians, et per Angelos nobis manifestans secundum sacram uniuscujusque divinitus illuminatorum analogiam.

Ad primum ergo dicendum, quod, non dicit aequipotentes Principatibus Archangelos, nisi tantum in actu hierarchico, qui est accipere illuminationem a media hierarchica et transfundere super ecclesiasticam: hoc enim potenter habent Principatus, Archangeli, et Angeli.

Ad aliud dicendum, quod ad superessentiale principium utrisque convenit, et Principatibus, et Archangelis, sed differenti modo. Principatibus enim convenit secundum acceptionem illuminationis ad limitationem Principatuum et ordinationes pertinentis. Archangelis vero quantum ad acceptionem illuminationis secreti consilii Dei, quod est de his quorum causae absconditae sunt in Deo, et non insertae rebus creatis. Et sic non oportet, quod idem ordo sit in specie Archangelorum et Principatuum.

Ad ultimum dicendum, quod propheticus ordo est in descensu illuminationis: prophetia enim, ut dicit Cassiodorus , est divina inspiratio, rerum eventus immobili veritate denuntians. Et haec inspiratio et illuminatio primo descendit in Angelos, et ab ipsis in Prophetas. Et hoc est quod dicitur, Sapientiae, vii, 27, quod spiritus sapientiae per nationes in animas sanctas se transfert, amicos Dei et Prophetas constituit.

ARTICULI PRIMI