MEMBRUM I.

In quo consistat ornatus, et in quo differat ab opere creationis et dispositionis ?

Primo ergo quaeritur, In quo consistat ornatus ?

Et videtur, quod nullum operum sex dierum consistat in ornatu.

1. Opera enim sex dierum pertinent ad esse principiorum naturalium quibus natura possit propagari, sicut patet enumeranti per singula: ornatus pertinet ad bene esse: ergo videtur, quod ornatus non sit de operibus sex dierum.

2. Adhuc, Ornatus fit de aliquo pulchro et pretioso, quod alterius naturae est quam id quod ornatur per ipsum: sol, luna, stellae non sunt alterius naturae quam caelum quod ornatur per ipsa, ut probat Aristoteles in II de Caelo ei Mundo: ergo videtur, quod sol, luna, et stellae non pertinent ad ornatum caeli.

3. Similis objectio est de piscibus, volatilibus, et animalibus: illa enim materialiter sunt de natura aeris, aquae, et terrae: ergo non pertinent ad ornatum eorum: non enim idem ornatur per idem.

4, Adhuc, Videtur quod opus ornatus sit opus distinctionis: quia super illud Genesis, i, 3: Fiat lux, dicit Strabus: " Pulchre ornamentum mundi a luce inchoat, sine qua omnia caetera opera indecora et invisibilia remanerent. " Et constat, quod cum dicitur: Fiat lux, incipit opus dispositionis, ut patet in praehabitis: ergo videtur, quod opus dispositionis et opus ornatus sint idem.

5. Adhuc, Augustinus super Genesim, ii, 1, super illud: Requievit Deus die septimo ab universo opere quod patrarat. " Quievit, id est, ab omni opere cessavit: quia nihil novum postea fecit quod non

ante in specie vel in materia fecerit. " Si hoc est verum: tunc videtur, quod opus ornatus nihil aliud sit nisi determinatio principiorum ad species, quibus speciebus ipsa principia naturae efficiantur agentia et patientia ad producendum id quod propagatur in natura in determinatas species.

6. Quod si concedatur: tunc videbitur, quod productio plantarum et herbarum pertineat ad ornatum. In illis enim ad determinatas species ad pulchritudinem mundi pertinentes movent principia naturae. Cujus contrarium ante habitum est: et expresse dicit Glossa Augustini super Genesim sic dicens, quod " plantae pertinent ad dispositionem, eo quod radicitus terrae sint affixae. "

Solutio. Dicendum, quod opus ornatus ab opere dispositionis et creationis differt. Quia opus creationis principia naturae ex quibus fit propagatio ex nihilo, facit esse secundum substantiam. Opus autem dispositionis disponit ea in contrarias formas, et in contraria loca, quibus contrariis agant et patiantur et transmutent materiam propagandorum. Sed quia nec per substantiam, nec per dispositionem contrariorum possunt agere determinatas species quibus simile ex simili producitur, ut homo ex homine, leo ex leone, et sic de aliis: ideo exigitur tertio loco opus ornatus, in quo determinatur principium naturae ad determinatam speciem, ut juxta genus suum et speciem simile sibi producat, in quo, ut dicit Boetius, sagax natura salvetur. Ad hoc enim potentiam non habet in substantia principii, quae facta est per creationem, nec in formis contrariorum quae distributae sunt principiis per distinctionem: et ideo oportuit, quod per ornatus acciperet determinatam speciem qua virtutem acciperet similia ex similibus propagandi.

Ad primum ergo dicendum, quod, duplex est ornatus. Est enim ornatus pertinens ad venustatem ejus quod jam per- fectum est: et ille pertinet ad bene esse, et est accidentalis. Et est ornatus qui determinat pulchritudinem formae eius quod ante indeterminatum et confusum erat. Et hic pertinet ad esse, et est in operibus sex dierum. Et hoc est idem quod alii dicunt, quod est ornatus cujus finis est id quod ornatur: et hic pertinet ad esse, et est accidentalis. Et est ornatus qui finis est ejus quod ornatur: et sic forma in natura finis et ornatus est materiae: et ultima forma quae est anima, ultimus finis et ultimus ornatus est: et hic ornatus pertinet ad esse et perfectionem naturae..

Ad aliud dicendum, quod ille ornatus qui est de esse, est de natura ejus quod ornatur et educitur ex illo per generationem sicut actus de potentia: sed ille qui est de bene esse et accidentalis, alterius naturae est, quam id quod ornatur per ipsum.

Per idem patet solutio ad id quod objicitur de piscibus, avibus, et animalibus.

Ad aliud dicendum, quod Strabus accipit ornatum in communi valde significatione nominis, secundum quod omne id quod aliquo modo venustat rem, sive sit intrinsecum rei, sive extrinsecum, dicitur ornatus. Et sic verum est, quod lux est de ornatu rerum, licet simpliciter sit pertinens ad dispositionem rerum. Ornatus autem qui dicitur esse unum opus sex dierum, est pertinens ad esse et speciem formae, sicut dictum est.

Sequens concedendum est sicut proponitur: quia hoc concludit quod dictum est.

Ad ultimum dicendum, quod plantae pertinent ad dispositionem, et non ad ornatum, nisi ornatus sumatur valde in communi pro omni eo quod venustat quocumque modo.

Quare autem pertineant ad dispositionem, sufficienter de opere tertiae diei dictum est.