Albert the Great, Commentarii In Psalmos

" Deus, repulisti nos. " Hic est Psalmus nonus in secunda parte totius libri, in secunda scilicet quinquagena, in quo postquam actum in Psalmo praecedenti de conversione Gentium ad Christum, et

etiam Judaeorum, quia parum est converti, nisi sequatur consummari in bono et salvari, agitur de eorum consummatione et sanatione in praesenti a reliquiis vitiorum, et futura glorificatione, in quibus erit plena commutatio, et consummata. Et hoc ostenditur satis in titulo proposito in Psalmo qui talis est : In finem, Pro his qui commutabuntur, in tituli inscriptionem ipsi David, in doctrinam, Cum succendit Mesopotamiam Syriae et Sobal, et convertit Joab, et percussit Edon in valle Salinarum duodecim millia. Hic enim tangitur quod dicitur II Reg. VIII, 1 et x, 7, et I Paralip. xviii, 1, de percussione Ammonitarum, et illorum qui secum venerunt in adjutorium contra David, scilicet illorum de Mesopotamia et Syria. Et illud quod habetur II Reg. viii, 1 et seq., quando David percussit Aderezer Regem Sobal, et fecit sibi totam Syriam tributariam, et ipsa capta et subjecta, subjecit etiam sibi Idumaeam, duodecim millibus Idumaeorum interfectis in valle Salinarum.

Sed ut aperte ostendatur, quod non respicit ad facta illa Psalmi intentio, sed ad significata, tangitur in titulo quod nusquam legitur, scilicet quod David converterit Joab. Remittantur ergo ad spiritualem intelligentiam, et conversionem Joab intelligamus spiritualiter, scilicet illorum qui per Joab designantur : et alias similiter victorias interpretemur. Et per hoc etiam, quia etsi David illas legitur subjecisse provincias, tamen non legitur succendisse, sicut hic dicitur. Et iterum sicut superius dictum fuit, quod ubi in titulo pronomen discretivum additur ad David, intelligendum est non de litterali.

Nota ergo, quod sunt homines elati superbi, qui significantur per Mesopotamiam : interpretatur enim elevata vocatio, et Syria, sublimis. Et sunt in malitia inveterati, qui significantur per Syriam Sobal, quod interpretatur vana vetustas. Et sunt homines Deo inimici, et bonum in alios persequentes, qui designantur per Joab, qui interpretatur inimicus. Et sunt terrenis omnino dediti, qui designantur per Edon, qui interpretatur terrenus. Omnes istos tamen ad sui tituli confessionem convertit Christus, ut

sequantur doctrinam Christianam secundum illud Psalmi lxxvii, 23 : Dixit Dominus : Ex Basan, id est, ex confusione peccati, convertam : et succendit igne charitatis. Ad Rom. V, 20 : Ubi abundavit delictum, superabundavit gratia. Et hoc est quod in titulo dicitur. Subjectus Psalmus " in finem, " supple, nos dirigens, editus est, " pro his qui commutabuntur " de regno diaboli, " in tituli inscriptionem, " in hoc quod tituli inscriptione demonstratur, scilicet in regnum Christi. Inscriptionem, inquam, factam " ipsi David, " id est, Christo, Vel, " commutabuntur " non sibi, sed " ipsi David, " id est, Christo, ut jam vivant ipsi soli. Ad Galat. II, 20 : Vivo autem, jam non ego, vivit vero in me Christus. Consentientes in doctrinam Christi : hic enim vere de regno diaboli commutatur in regnum Christi, qui sequitur doctrinam ejus, quae est doctrina pietatis. Super illud I ad Tim. IV, 8 : Pietas autem ad omnia, etc, Glossa : " Omnis summa " doctrinae Christianae religionis de pieta-" te, et misericordia. " Pietate ad Deum, misericordia quantum ad proximum : quod totum factum est, " quando succendit David, " id est, Christus, " Mesopotamiam Syriae, " igne charitatis superbos et electos inflammavit. " Et Syriam Sobal, " in superbia et sublimitate antiquatos. " Et convertit Joab, " id est, inimicum prius, ipsum faciens amicum, sicut factum est in Paulo . Vel convertit per hoc inimicum, id est, diabolum, retrorsum expellens, cum diabolus fugit, et retrorsum convertitur quando homo convertitur ad Christum, qui inimicus

appellatur. Matth. XIII, 28 : Inimicus homo hoc fecit. " Et percussit, " gladio spiritus, quod est verbum Dei . " Edon, " id est, de Edon ut sit casus genitivi, id est, de terrenis, " duodecim millia, " id est, generaliter mandata decalogi cum charitate gemina custodientes : in millenario enim perfectio et universitas, in duodenario observatio decalogi propter denarium, et charitas gemina propter binarium designatur. Sed quia non valeret converti nisi adesset humilitas, et discretio, signanter addit : " In valle Salinarum. " Vallis enim Salinarum sic dicebatur a sale, cujus similitudo in illa valle reperiebatur. Et notatur in hoc humilis discretio, et discreta humilitas. Humilitas in valle : Gregorius : " Qui caete-" ras virtutes sine humilitate congregat, " quasi pulverem in ventum portat. " Levit. II, 13, praecipiebatur, quod in omni sacrificio Domini poneretur sal. Et Bernardus dicit, quod " discretio est au-" riga virtutum. "

Dividitur autem Psalmus in duas partes. Primo enim petit loquens in parte conversorum de Gentibus et Judaeis, consummationem in bono. Secundo, conversionem ipsarum tribulationum in utilitatem, et gloriam, ibi, " Da nobis auxilium, "

In prima duo. Primo, petit ut sanentur a reliquiis peccatorum. Secundo, ut sanati salventur, ibi, " Salvum fac dextera. "

In prima dicuntur tria. Primo, recolunt bona quae fecit sibi Deus. Secundo, petunt ut perficiat quod bene inchoavit eos sanando, ibi, " Sana contritiones ejus. " Tertio, ostendunt quod sonandi sunt, ibi, " Quia commota est. "

In prima duo. Primo ostendunt bonum quod eis est a Deo factum. Secundo, modum quo factum est, ibi, " Iratus es, "

In prima duo secundum duplex bo- num. Primum est malae voluntatis amotio. Secundum, pravae consuetudinis destructio, ibi, " Destruxisti nos. "