MEMBRUM II.

Utrum conveniebat propagationem fieri ex viro et muliere, vel ex uno tantum ?

Secundo quaeritur, Si conveniebat propagationem fieri ex viro et muliere, vel ex uno tantum ?

Et videtur, quod ex uno: talis enim propagatio simplicior est, et concupiscentia non permixta, et primo principio similior, ex quo sine divisione sui omnia procedunt per solum amorem. Sic enim plantae procedunt et multiplicantur: sic etiam Adam ex humo, virgo ex virgine processit: sic Heva virgo ex virgine Adam processit, et sic Filius Dei virgo ex virgine Maria processit. Propter quod dicitur, Genes, xv, 16: Generatione quarta revertentur huc. Et dicit Chrysostomus, quod prima generatio est viri virginis ex terra virgine. Secunda mulieris virginis ex Auro virgine. Tertia prolis virgineae ex viri et mulieris commixtione, quae profundit peccatum, quia deficit a virginitate. Quarta viri virginis ex foemina virgine, per quam reformatur natura, et restituitur gratia.

Quaerunt etiam quidam, Quare utrumque sexum non fecit in uno corpore?

Et ponunt rationem, quod ita deberet esse, si (sicut dicunt Sancti) Hevam ex corpore Adae produxit, ut esset hoc signum majoris dilectionis ad eam, ut scilicet de corpore suo productam tamquam seipsum diligeret; tunc multo majori vinculo charitatis adstringeretur, si in uno corpore utrumque fecisset.

Solutio. Dicendum, quod Deus Adam et Hevam constituit ut principia perfectae generationis et perfectissimi animalis,. quod ad imaginem Dei factum est. Principia autem perfectae generationis non possunt esse in uno, sed in duobus: quorum unus est masculus, qui (sicut dicit Aristoteles in XVII Animalium) est generans propria, virtute. Alter foemina generans ex alio in seipso. Nec virtutes istae in uno congregari possunt perfecte. Formans enim virtus, ut dicit Avicenna, confortatur calido sicco, formabilis vero frigido humido: quae si in unum corpus congregarentur secundum suas intensiones, destrueretur perfecta generatio: propter hoc quod hermaphroditus non generat.

Ad primum ergo dicendum, quod Deus iacit res secundum quod sunt utiles ad finem constitutionis Adam et Hevae, et generatio est ad propagationem generis humani ut perficiatur numerus electorum, et ad hoc non esset utilis nisi esset

distinctio sexus: nec tamen per hoc similitudinem primi principii perdidit, ex quo procedunt omnia. Quia, sicut jam habitum est, Heva quae est materiale principium omnium, ex Adam processit: et per consequens omnes nati de Heva ex Adam processerunt. Et quando dicitur a Sanctis, quod generationes quatuor sunt, non accipitur divisio per diversam virtutem generativam., sed per diversum modum generantium et generatorum: et sic bona est: sed non ad propagationem, quia tales modi in natura exemplum habere non possunt.

Ad aliud dicendum, quod stulta quaestio est illa: quia licet hoc sicut in signo sit in productione Hevae de corpore Adae, tamen hoc non est causa finalis, sed potius generatio ad implendum numerum electorum: et illud scilicet vinculum amoris est quoddam adjunctum, propter quod non debuit admitti distinctio sexus. Et quod in plantis in uno cor pore est impraegnans et impraegnatum, signum imperfectionis est, quia scilicet planta non habet animam, sed partem partis animae, ut dicit Aristoteles in primo de Vegetabilibus: et quia non habet vitam manifestam, sed occultam, ut ibidem dicit Aristoteles. Concupiscentia vero non est causata a distinctione sexus, sed ex peccato. Et propter hoc dicit Augustinus, quod " si non peccassent, sine peccato genuissent, et convenissent, et fuisset eis thorus immaculatus. "