MEMBRUM II

Utrum corpus mulieris ejusdem vel aequalis fuerit dignitatis cum corpore viri ?

Secundo quaeritur, Utrum corpus mulieris ejusdem vel aequalis fuerit dignitatis cum corpore viri?

Hoc enim videtur.

1. Basilius enim dicit in Hexameron, quod aequalis fuerit dignitatis vir et mulier.

2. Adhuc, aequaliter ordinati ad virtutem, aequaliter nobiles sunt: vir et mulier aequaliter ordinati sunt ad virtutem quae veram confert nobilitatem: ergo aequaliter digni.

3. Adhuc, Dignitas est ex parte ani- mae quae ad imaginem Dei est: aequaliter sunt ad imaginem Dei tam anima viri, quam anima mulieris: ergo aequalis dignitatis.

4. Adhuc, Quae unius speciei sunt, aequalis dignitatis sunt participando speciem illam: vir et mulier unius speciei sunt facti a Deo: ergo videtur, quod aequalis dignitatis.

Contra:

1. Augustinus in Musica: " Omnino agens dignius patiente. " Vir autem est ut agens, mulier ut patiens. Ergo vir dignior muliere.

2. Adhuc, I ad Corinth. xi, 3: Caput mulieris, vir. Caput dignius est. Ergo vir dignior muliere.

3. Adhuc, I ad Timoth, ii, 14: Adam non est seductus, mulier autem seducta in praevaricatione fuit. Ibi Augustinus In Glossa dicit, quod " non est credendum virum spirituali mente praeditum, hoc verum fuisse et credidisse quod serpens persuasit: sed mulier seducta fuit ad hoc quod hoc credidit. " Ergo vir dignior muliere: spirituali enim mente praeditus dignior est quam non praeditus tali mente.

In contrarium hujus esse videtur, quod mulier secundum materiam et locum formationis dignior videtur esse viro. Secundum materiam: quia formata est de costa, vir vero de limo terrae. Secundum locum: quia ipsa formata est in paradiso, vir vero extra paradisum. Unde etiam vir dixit praesentata sibi muliere: Hoc nunc os ex ossibus meis, et caro de carne mea: haec vocabitur Virago, quoniam de viro sumpta est.

Solutio. Dicendum, quod pro certo simpliciter loquendo vir dignior est muliere: quia caput est, ut dicit Apostolus . Et Aristoteles In primo Politicorum dicit, quod " in communicatione qua sibi communicant vir et mulier, vir est sicut principans, et mulier sicut subjecta. " Et ideo Salomon ait in Proverbiis, Eccli, xxv, 30: Mulier si primatum habeat, contraria est viro suo. Secundum quid tamen potest aliqua mulier dignior esse aliquo viro.

Ad primum ergo dicendum, quod dictum Basilii intelligitur secundum quid, et non simpliciter: aequales enim erant in hoc, quod aequaliter participabant gratiam innocentiae, et aequalem ordinem, habebant ad virtutem et meritum: et hoc est aequales esse secundum quid, et non simpliciter.

Ex praedicto patet solutio ad sequens: quia hoc non facit aequalitatem nisi secundum quid et non simpliciter. Sicut enim, dicit Apostolus, ad Galat, iii, 28: Non est masculus, neque foemina: omnes enim vos unum estis in Christo Jesu.

Ad aliud dicendum, quod ex hoc non probatur nisi quod sint aequales secundum quid, et non simpliciter. Non enim sequitur, sunt aequales in hoc, ergo sunt simpliciter aequales.

An aliud recte eodem modo dicendum: participatio enim unius speciei non facit aequalitatem, nisi in hoc, et non simpliciter: quia licet idem sit quod participant, species scilicet: tamen modus participandi secundum esse valde est inaequalis.

Ad id quod in contrarium objicitur, dicendum quod id quod Augustinus didicit in Musica, simpliciter est verum: et ideo vir simpliciter dignior est muliere.

Ad aliud dicendum, quod in omnibus in quibus sibi vir et mulier communicant, caput est vir, et dignior muliere: et hoc non repugnat, quin in aliquo dignior possit esse mulier in quo viro non communicat.

Ad aliud dicendum, quod vir spirituali mente praeditus dicitur, quia spiritualium notitiam accepit a Deo, quae ad mulierem transire non debuit, nisi per virum. I ad Corinth. xiv, 34 et 35: Mulieres in ecclesiis taceant: non enim permittitur eis loqui, sed subditas esse, sicut et lex dicit . Si quid autem volunt discere, domi viros suos interrogent...

Ad hoc quod objicitur in contrarium, dicendum quod ex materia non est dignitas simpliciter, sed secundum quid tantum. Similiter ex loco non est dignitas, nisi ibi locus est principium generationis et salvativus locati, sicut est in physicis. Et hoc non fuit in Heva, cujus formationis non fuit causa nisi Deus: et, sicut ante dictum est, ex nulla re paradisi facta fuit, nec salvabatur a contrariis nisi per gratiam innocentiae.