MEMBRUM III.

Quare diabolus primo incepit tentationem a muliere, et non a viro ?

Tertio quaeritur, Quare incepit primo a muliere, et non a viro ?

Videtur enim, quod a viro congruentius incepisset: quia

1. Praeceptum datum fuit viro: cum ergo illius sit tentari de transgressione., cui praeceptum est datum, videtur quod a viro debuit incipere.

2. Adhuc, Principium totius humani generis non fuit mulier, sed vir: materialiter enim totum humanum genus fuit in Adam, et non in Heva. Gom ergo diabolus niteretur corrumpere totum humanum genus una transgressione,

videtur quod potius debuit incipere ab

Adam, quam ab Heva.

Contra:

1. Eccli, xxv, 33: A muliere factum est initium omnis peccati, et per illam omnes morimur,

2. Adhuc, Augustinus in libro de Trinitate: " Corpore sibi subjecto tamquam instrumento serpentis scilicet abutens, fallaciam praemolitus est foeminae, scilicet a parte inferiori humanae copulae incipiens, ut gradatim perveniret ad totum. " Ergo videtur, quod magis congruum fuit ei incipere a foemina, quam a viro.

3. Adhuc, Serpens cum callidior esset cunctis animantibus terrae , scivit virum spirituali mente praeditum, qui decipi facile non posset in forma serpentina. Ergo videtur, quod non elegit virum per seipsum tentare, sed foeminam.

Solutio. Dicendum, quod absque dubio secundum auctoritates Sanctorum serpens ex astutia diaboli qui erat in serpente, elegit hominem aggredi ex parte mulieris, quae infirmior est et magis deceptibilis, ut sic postquam mulierem attraxisset, adjutorio mulieris facilius prosterneret virum. Et hoc est quod dicit Apostolus, I ad Timoth, ii, 14: Adam non est seductus, mulier autem seducta in praevaricatione fuit. Ubi dicit Augustinus glossans illud, quod non est credendum, quod vir spirituali mente praeditus, a serpente seductus sit, ut verum crederet quod serpens persuasit, ut scilicet ex comestione pomi assequeretur similitudinem Dei, ut fierent sicut dii scientes bonum et malum: sed videns transgressam esse mulierem, et scieris veritatem verbi Dei, quod scilicet

morti esset addicta et corruptioni, ne contristaret suas delicias, accepit et comedit cum ea: et sic ambo necessitati mortis addicti sunt.

Hujus etiam assignat aliam causam Augustinus in libro XI super Genesim ad litteram dicens, quod in prima tentatione primorum parentum ostenditur, qualiter tentatio progreditur in omnibus posteris primorum peccatorum. Sicut enim in illis tentatio a serpente processit in mulierem, et a muliere in virum: ita in posteritate quae loco serpentis est propter illecebrosos motus, progreditur in inferiorem partem rationis, quae loco mulieris est, eo quod regitur a superiori sicut mulier a viro, et ab inferiori parte ad superiorem sicut ad virum: et sic corrumpitur totus homo.

Ad primum ergo dicendum, quod licet praeceptum principaliter datum fuit viro, tamen etiam datum fuit mulieri, sicut etiam expresse dicit Magister in Littera. Et hoc etiam innuitur in verbis serpentis: dicit enim, Cur praecepit vobis Deus : et hoc dicit Magister in illo cap. Illud etiam notandum est, quod, est ultimum capitulum distinctionis vicesimam primae libri II Sententiarum . Astutiam etiam suam non ita ostenderet serpens, si ex parte firmiori aggressus esset, sicut ostendit quando aggressus est a parte infirmiori.

Ad aliud dicendum, quod scivit bene, quod Adam fuit principium humani generis, et non Heva: et quanto perfectiorem scivit, tanto magis primo aggredi timuit, timens ne pateretur repulsam.

Tria quae inducuntur in contrarium concedenda sunt et procedunt.