Albert the Great, Commentarii In Psalmos

Dicit ergo : Haec quae praemisi bona, certus sum quod facies omnibus, et etiam c( speciosa deserti, " Gentilitatis scilicet, quae infructuosa erat, " pinguescent " pinguedine internae devotionis, et spiritualis laetitiae, quam petebat supra David, Psal. lxii, 6 : Sicut adipe et pinguedine, etc. De qua Jer. XXXI, 14. Inebriabo animam sacerdotum pinguedine.

Et nota, quod est pinguedo terrae, scilicet abundantia, de qua in benedictione Esau, Genes, xxvii, 28 : Det tibi Deus de pinguedine terrae. Psal. XXI, 30 : Adorabunt omnes pingues terrae. Haec est valde periculosa, quia excaecat, Job, xv, 27 : Operuit faciem ejus crassitudo, ut non videret Deum. Crassitudo materiam iniquitatis praestat, Psal. lxxii, 7 : Prodiit quasi ex adipe iniquitas eorum. Luxuriae fomentum ministrat, Jerem. vii, 18 : Filii colligunt ligna, et patres succendunt ignem, ei mulieres conspergunt adipem : colligunt adipem lignis, dis- cursus, et occasiones luxuriandi. In adipe temporalium abundantia, quae conspergitur per mulieres, quando repraesentant et ostendunt suas pulchritudines.

Et est pinguedo pessima et diabolica, delectatio in malitia, de qua Job, xv, 26 : Cucurrit adversus eum, scilicet Deum, erecto collo, et pingui cervice armatus est. Sic pingues diabolus ad festum mactandos praeparat. Zachar.XI, 4 et 3 : Pasce pecora occisionis. Ezech.XXIV,5 : Pinguissimum pecus assume, hominem, qui sicut pecus in peccatis est delectatus: congere frusta ejus in ollam aeneam, id est, in gehennam. 1 Reg. xv, 32 : Et oblatus est ei Agag pinguissimus... Et in frusta concidit eum Samuel coram Domino in Galgalis.

Et est pinguedo optima internae devotionis, quasi pinguedo deserti, hoc est, claustri, et castus amor verae paenitentiae, de qua hic : creatur sicut alibi dictum est, ex dulci somno contemplationis, ex abundantia optimae refectionis Scripturae et Sacramenti altaris, ex abjectione curae et sollicitudinis rerum temporalium, quae pungunt sicut spinae.

" Et exsultatione. " Ecce secundum. Quasi diceret : Sic erunt devoti, " et colles, " Gentiles scilicet, humiles, et propter hoc alti secundum divinum judicium. Luc. XIV, 11 : Qui se humiliat, exaltabitur. " Accingentur, " ad strenue praedicandum, gladio verbi Dei. Supra, in Psal. xliv, 4 : Accingere gladio tuo super femur tuum, etc. Et hoc, " in exsultatione : " secus enim non placeret. Eccli.XXXV, 11 : In omni dato, etc. II ad Cor. IX, 7 : Hilarem enim datorem, diligit Deus.

" Induti sunt. " Hic bonum in Judaeis, et primo in majoribus, ut in Apostolis. Secundo, in aliis, scilicet in minoribus, " ibi, " Et valles, "

Ait enim : Sic in Gentilibus, et etiam " arietes ovium, " supple, duces, scilicet Apostoli : illi, inquam, arietes, de qui- bus Isa. lx, 7 : Arietes Nabajoth ministrabunt tibi. Defensores etiam erant gregis, armati duobus cornibus, scilicet Testamentis. " Induti sunt, " repete, exsultatione, propter fructum quem videbant in illis quibus praedicabant. Vel melius, charitate quae vestis est nuptialis. Matth. xii 12 : Amice, quomodo huc intrasti, non habens vestem nuptialem ?

" Et valles, " id est, populi humiles Judaeorum, " abundabunt frumento, " verbi Dei, de quo Prov.XI, 26 : Qui abscondit frumenta, maledicetur in populis : benedictio autem super caput vendentium, populis proponentium. Propter hoc benedictus fuit Joseph, qui frumenta vendidit in populo. Et bene dicit : " Valles abundabunt : " quia in humilibus abundat verbum Dei, et sapientia. Prov. XI, 2 : Ubi est humilitas, ibi sapientia. Joel, ii, 19 : Ecce ego mittam vobis frumentum, vinum, et oleum, et replebimini in eis.

" Clamabunt. " Ostenso quod beneficia conferentur, hic asserit quod gratiae referentur datori : et tangitur modus gratias referendi ex parte agentium gratias. Primo, quod ardenter. Secundo, quod laetanter, ibi, " Etenim. "

Ait enim : Haec beneficia facies : et propter hoc " clamabunt, " prae desiderio in fervore. Isa. lviii, 1 : Clama, ne cesses.

." Etenim hymnum, " qui est cantus laetitiae, " dicent "in grati arum actionem. II Machab. x, 38 : In hymnis et confessionibus benedicebant Dominum, qui magna fecit in Israel. Et eo ipso, quod hymnum dicent, magis ac magis abundabunt. Gregorius : " Si clamant in " hymno, abundabunt in frumento. " Haec audiant qui propter studium dimittunt officium. Si in hymno clamarent, et frumento abundarent : in frumento doctrinae, et postea in frumento gloriae horrei caelestis. Amen.