Albert the Great, Commentarii In Psalmos

Dicit ergo : Reddam vota. Et haec de bono : " quae, " id est, quia illa " distinxerunt labia mea. " Quasi diceret : Voluntarie promisi illa. Psal. LIII, 8 : Voluntarie sacrificabo tibi.

In distinctione etiam notatur discretio. Quasi diceret : Non solum voluntarie factum est, sed cum magna discretione. Levit.II, 13 : In omni oblationc tua offeres sal. Item, in distinctione notatur praeelectio melioris : qui enim Deo vult offerre, debet distinguere quod melius est, et illud dare, ne sit sicut Cain, qui se dabat diabolo, et meliora sua retinebat sibi, et deteriora Deo dabat . Malach.I, 14 : Maledictus dolosus, qui habet in grege suo masculum, et votum faciens debile immolat Domino. Eccle. v, 3 : Displicet ei, id est, Deo, infidelis, sine electione melioris, et stulta, sine discretione, promissio.

" Et locutum est os meum. " Hic secundum, in quo ostendit quando. Quasi diceret : Sic reddam vota quae promisi : " et locutum est, " illa promittendo, " os meum, " non aliud, " in tribulatione mea. " II Esdr. IX, 27 : In tempore tribulationis suae clamaverunt ad te, ei tu de caelo audisti eos. Eccli. li, 33 : Aperui os meum, et locutus sum. Et hoc " in tribulatione mea. " Argumentum contra illos, qui credunt se non teneri quando tribulatione compulsi vovent. Osee, VI, 1 : In tribulatione sua mane consurgent ad me. Jonae, I, 16 : Et timuerunt timore magno Dominum, et immolaverunt hostias Domino, ei voverunt vota,

" Holocausta medullata. " Hic tertium, quae voverit, et qualia.Primo, quod, devota, et plena charitate sacrificia. Secundo, quod pura et consummata ab omni malitia, ibi, " Cum incenso. "

Ait enim : Sic in tribulatione mea vovi, et quid hoc? " Holocausta medullata, " oblationes et opera pinguedine et medulla charitatis plena. Sicut enim medulla vitam totius animalis tenet, et conservat, sic charitas omnium bonorum. Propter quod dicitur, Eccli. XXXV, 8 : Oblatio justi impinguat altare. Hic medullata sacrificia Deo offeruntur : sed ipse tandem nuda medulla, sincerissima charitate suos satiabit. Genes. xlv, 18 : Comedetis medullam terrae. Isa. XXV, 6 : Faciet Dominus in monte hoc convivium pinguium, convivium medullatorum.

" Offeram tibi, " non alii : " cum incenso arietum. " Hic secundum, quia pura, quia absque repugnatione superbiae, quae significatur in ariete : et cupiditate avaritiae, quae significatur in bove, qui arat terram : et sine faetido motu luxuriae, qui significatur in hircis.

Ait enim : Sic novi offerre holocausta medullata : et hoc " cum incenso, " id est, cum incensione et destructione " arietum, " motuum superbiae resistentium Deo, et repugnantium.

" Offeram tibi boves, " motus avaritiae circa terrena negotiantes. " Cum hircis, " cum motibus foedis. Offeram, inquam, mactando, et destruendo. Genes. XV,9 et seq., Abraham haec tria Deo obtulit, et combussit. Arietes etiam Apostoli. Supra, in alio Psal. XCIV, 14 : Induti sunt arietes ovium. Et Isa. lx, 7 : Arietes Nabajoth ministrabunt tibi. Cum incenso ergo arietum fit Deo oblatio, quando Deo opus bonum datur cum oratione Apostolorum, id est, cum modo orandi ab eis instituto. Psal. cxl, 2 : Dirigatur oratio mea sicut incensum. Item, arietes sunt Praelati. Proverb. XXX, 31 : Aries, nec est rex, qui resistat ei. Boves sunt praedicatores. Job, I, 14 : Boves arabant, et asinae pascebantur juxta illos. Proverb, XIV, 4 : Ubi plurimae sunt segetes, ibi manifesta est fortitudo boum. Hirci faetidi peccatores. Genes. xxvii, 25, Isaac haedis libenter vescitur. Haec tria genera offert Ecclesia, sicut praeceptum fuit, Levit. III, 1 et seq.

" Venite, audite. " Hic est quarta pars Psalmi, in qua monet exemplo sui spec rare in Deum eos qui timent ipsum. Talibus enim magis necessaria est spes, ne nimio timore desperent : et dicuntur duo. Primo, enumerat bona sibi a Deo facta. Secundo, gratias agit, et benedicit pro illis, ibi, " Benedictus Deus. "

In prima duo. Primo, excitatio timidorum ut audiant bona a Deo sibi facta narraturum. Secundo, explicat illa bona, ibi, " Ad ipsum ore meo clamavi. "

In prima tria. Primo, ut se praeparent. Secundo, ut praeparati audiant a narrante, ibi, " Audite. " Tertio, qui sunt qui audire debent, ibi, " Omnes qui timetis. "