Albert the Great, Commentarii In Psalmos

Dicit ergo : Sic increpa, quod si forte increpatio non sufficit ad correctionem, " dissipa, " quod plus est, " Gentes, " haereticos omnes fidei adversarios, " quae bella volunt, " quae non correctioni, sed magis contentioni intendunt. Gen, xlix, 5 : Simeon et Levi fratres : vasa iniquitatis bellantia. Proverb.XVI, 28 : Homo perversus, haereticus scilicet, suscitat lites : et verbosus separat principes. Non sic fideles. I ad Cor. XI, 16 : Si quis videtur contentiosus esse : nos talem consuetudinem non habemus, neque Ecclesia Dei. Sed sicut Prov. xiii, 10, dicitur, Inter superbos semper jurgia sunt. Hos dissipa, horum scilicet consilium perversum, et mala opera. Job, v, 12 et 13 : Deus... qui dissipat cogitationes malignorum, ne possint implere manus eorum, quod coeperant: qui apprehendit sapientes in astutia eorum, et consilium pravorum dissipat. Supra, in Psal. xxxii, 10 : Dominus dissipat consilia gentium. Mali advocati sunt, pro iis rogat ut dissipentur.

" Venient legati. " Ecce secundum. Quasi diceret: Sic petii, et sic fiet, quia " venient legati, " praedicatores, et praelati boni, mediatores ad reconciliationem, " ex aegypto, " ex tenebris mundi et peccato, sicut Paulus, et Matthaeus, et Petrus, qui fuerunt maximi peccatores. Hoc est quod cantamus de Augustino : " Qui de tenebris Gentium lumen Ecclesiae suae vocavit Augustinum. " II ad Cor. .IV, 6 : Qui dixit de tenebris lumen splendescere. Talis ergo legatus erat, qui dicebat, II ad Cor. v, 20 : Pro Christo legatione fungimur. Et ad Ephes.VI, 20 : Pro quo legatione fungor in catena.

"aethiopia,. " Hic tertium, in quo tangitur modus et ordo quo fiet: et legitur tripliciter.

Primo ut non sit ibi, " Deo, " in fine versus, et " ejus " referatur ad Deum : et est sensus : Sic venient legati et l)o ctores, et " aethiopia, " gens peccatis nigra et horrida, ad praedicationem legatorum mota, " praeveniet, " seipsam per paenitentiam affligendo, " manus ejus, " Dei scilicet percutientis. I ad Cor. XI, 31 : Quod si nosmetipsos diiudicaremus, non utique judicaremur.

Vel sic, ut sit ibi, " Deo, " in fine versus: et tunc dupliciter, quia relativum ejus potest referri ad hoc quod est aethiopia : et est sensus :"aethiopia"Deo fide adhaerens, " praeveniet manus ejus, " id est, aethiopiae, scilicet opera sua per fidem: fides enim debet praecedere bona opera. Ad Hebr.XI, 6 : Sine fide impossibile est placere Deo.

Vel ut referatur ad aegyptum, et tunc supponitur etiam per aegyptum populus Judaeorum : et est sensus : " aethiopia, " adhaerens " Deo, " ut supra, " praeveniet manus ejus, " scilicet aegypti, hoc est, Judaici populi: Gentiles enim ipsos ad fidem et bona opera praevenerunt. Ad Rom. XI, 25 : Caecitas ex parte contigit in Israel, donec plenitudo Gentium intraret. Alia est littera :" aethiopia festinet manus dare Deo, " quod planum est.

" Regna terrae. " Hic secundum hujus partis, in quo invitat pro Ecclesiae dilatatione et conformatione omnia regna ad laudem Dei: et primo ad laudem devotam oris. Secundo, operis, ibi, " Psallite Domino. "