PARTICULA III.

Si sola Heva peccasset ei non Adam, quid transfunderetur in parvulos, utrum originale peccatum, vel quid, ?

Tertio quaeritur, Si sola Heva peccasset et non Adam quid transfunderetur in parvulos, utrum originale, vel quid?

Et videtur, quod originale,

1. Per auctoritatem supra inductam,

Eccli, xxv, 33: A muliere initium factum est peccati, et per illam omnes morimur,

2. Adhuc, Objiciunt quidam, licet parum valeat, quod a vase corrupto corrumpitur contentum, sicut vinum corrumpitur a vase corrupto. Et videtur, quod Heva corrupta vas fuit totius naturae, et tota natura corrupta fuisset etiamsi Adam non peccasset.

Solutio. Dicendum, quod haec quaestio determinata est ab Anselmo dicente sic: " Si Heva sola peccasset et non Adam, peccatum ut personale in ipsa sola remansisset, et Deus de corpore Adae aliam mulierem fecisset, per quam per commixtionem cum Adam propositum Dei de multiplicatione hominum perficeretur. " Sed antiqui Praepositivus scilicet et Gulielmus Altisiodorensis dixerunt, quod si sola mulier peccasset, et per eam post peccatum Adam genuisset, foeditatem corporeae corruptionis transfudisset, sed non originale peccatum. Sed dictum Anselmi videtur mihi probabilius propter verbum Augustini, qui dicit., quod " divinae justitiae non congruit, quod eos teneat paena, quos ad paenam non obligat culpa. " Unde injuste videretur, quod a matre reciperent foeditatem poenalem, qui non recipiunt culpam.

Ad primum ergo dicendum, quod sicut supra saepe dictum est, a muliere fuit initium peccati personalis in Adam, sed non originalis in natura,

Ad aliud quod dicitur de vase corrupto, dicendum quod non est simile: quia mulier numquam fuit vas in quo umquam tota humana natura esset simul, in quam serpit originale: sed Adam tale vas fuit, in cujus lumbis omnes homines fuerunt secundum corpulentam substantiam et secundum legem concupiscentiae, praeter Christum, qui tantum fuit ibi secundum corpulentam substantiam: et ideo originale non contraxit. Praeterea uterus mulieris extrinsecum vas est ad parvulum: semen autem viri for- mans intrinsecum: et ideo corruptio seminis viri serpit in parvulum, et non corruptio uteri matris.